حکومت سرمایہ کار دوست ماحول پیدا کرنے اور ڈھانچہ جاتی اصلاحات کے لئے پرعزم ہے ،وفاقی وزیر قیصر احمد شیخ

حیدرآباد (اُردو پوائنٹ اخبارتازہ ترین - اے پی پی۔ 18 اگست2025ء) اسرا یونیورسٹی حیدرآباد میں پوسٹ بجٹ سیمینار 2025-26 منعقد ہوا، جس میں پالیسی سازوں، ماہرین تعلیم، صنعتکاروں اور مالیاتی ماہرین نے قومی بجٹ کا تفصیلی تجزیہ کرتے ہوئے معیشت، سرمایہ کاری اور سماجی ترقی پر اس کے اثرات پر روشنی ڈالی۔ تقریب کے مہمان خصوصی وفاقی وزیر برائے سرمایہ کاری قیصر احمد شیخ تھے جبکہ صدر و سی ای او اسرا اسلامک فاؤنڈیشن پروفیسر ڈاکٹر حمید اللہ قاضی اور وائس چانسلر اسرا یونیورسٹی ڈاکٹر احمد ولی اللہ قاضی سمیت دیگر شخصیات نے شرکت کی۔

اس موقع پر وفاقی وزیر برائے سرمایہ کاری قیصر احمد شیخ نے اپنے تفصیلی خطاب میں پاکستان کی اقتصادی ترجیحات کا خاکہ پیش کیا اور کہا کہ حکومت غیر ملکی سرمایہ کاری کے فروغ، تجارتی خسارہ کم کرنے، چھوٹے اور درمیانے درجے کے کاروبار کی معاونت اور نوجوانوں کی کاروباری صلاحیت بڑھانے پر خصوصی توجہ دے رہی ہے۔

(جاری ہے)

انہوں نے کہا کہ حکومت سرمایہ کار دوست ماحول پیدا کرنے اور ڈھانچہ جاتی اصلاحات نافذ کرنے کے لیے پرعزم ہے۔

وفاقی وزیر نے اسرا یونیورسٹی کو بروقت اور اہم سیمینار منعقد کرنے پر سراہا جو اکیڈمیہ کو معاشی پالیسی مباحثے میں فعال کردار ادا کرنے کا موقع فراہم کرتا ہے۔ آئی او بی ایم کراچی کی پروفیسر ڈاکٹر شاہدہ وزارت نے بجٹ 2025-26 کے فوائد و نقصانات، مہنگائی، قرضوں کے انتظام، غذائی تحفظ اور صنعتی پیداوار پر تفصیلی روشنی ڈالی۔ اپنے استقبالیہ خطاب میں ڈاکٹر احمد ولی اللہ قاضی نے کہا کہ تعلیمی ادارے پالیسی، صنعت اور معاشرے کے درمیان پل کا کردار ادا کرتے ہیں۔

پروفیسر ڈاکٹر حمید اللہ قاضی نے کہا کہ جامعات عوام میں مالیاتی پالیسیوں اور قومی بجٹ کے حوالے سے شعور اجاگر کرنے میں اہم کردار ادا کرتی ہیں۔ بعد ازاں “بجٹ 2025-26 کے مواقع اور اثرات” کے موضوع پر پینل ڈسکشن منعقد ہوا جس میں صوبائی اور قومی مالیاتی حکمت عملی، کارپوریٹ سیکٹر کا کردار، بینکاری اصلاحات اور چھوٹے تاجروں کو درپیش مسائل پر تفصیلی گفتگو کی گئی۔ پینل اراکین میں انجینئر صابر حسین قائم خانی، میجر (ر) سید آفتاب محمود زیدی، اسرار احمد، ڈاکٹر اسماعیل نامی اور عبدالمجید شیخ شامل تھے۔