امیرجماعت اہل سنت آزاد کشمیررواں سال میلادمصطفی ﷺ بھرپور طریقے سے منانے کا اعلان

مظفرآباد(اُردو پوائنٹ اخبارتازہ ترین - این این آئی۔ 19 اگست2025ء)امیر جماعت اہل سنت آزاد کشمیر علامہ سیدمحمداسحا ق نقوی کاریاست بھر میں اسلامی تعاون تنظیم (OIC) کی تاریخی اور متفقہ قرارداد کی روشنی میں ہجری سال 1447ھ کو رسول اللہ ﷺ کی ولادت باسعادت کے پندرہ سو سال مکمل ہونے پر ''سالِ میلادمصطفی ﷺ '' کے طور پر منانے کا اعلان ، اس سلسلہ میں جماعت اہل سنت وسنی سپریم کونسل کے زیر اہتمام مظفرآباد، جہلم ویلی ، وادی نیلم، باغ، راولاکوٹ، سدھنوتی، کوٹلی، میرپور اور بھمبر تک تمام علاقوں میں ماہِ ربیع الاول کے آغاز سے لے کر سال بھر میلادالنبی ﷺ اورسیرت النبی ﷺ سے متعلق روح پرور تقریبات کا انعقاد کیا جائے گا۔

امیر جماعت اہل سنت آزاد کشمیر علامہ سید محمد اسحاق نقوی نے اس بابرکت اعلان کو’’تاریخ امت میں ایک روحانی سنگ ِ میل‘‘ قرار دیتے ہوئے کہا کہ یہ سال صرف خوشی و جشن کا نہیں بلکہ تجدیدِ ایمان، اصلاحِ معاشرہ اور محبتِ رسول ﷺ کے عملی مظاہرہ کا سال ہونا چاہیے۔

(جاری ہے)

سیرتِ مصطفیٰ ﷺ کو سمجھنا اور اس پر عمل پیرا ہونا ہی انسانیت کے زخموں کا مرہم ہے اور دنیا کو درپیش فکری، اخلاقی اور روحانی بحرانوں کا واحد حل بھی۔

امیر جماعت اہل سنت علامہ سید محمد اسحاق نقوی نے کہا کہ یہ سال نوجوان نسل کو سیرتِ طیبہ ﷺ کے مطالعہ کی جانب راغب کرنے، تعلیمی اداروں میں خصوصی تقریری مقابلوں، سیرت کورسز، ، اور میڈیا پر جاری نعتیہ اور سیرت طیبہ کی تقاریر کے مقابلہ جات کی صورت میں نئی روحانی بیداری کا پیغام دے گا۔ مختلف شعبہ ہائے زندگی سے تعلق رکھنے والے افراد کے لیے سیرت پر مبنی تربیتی نشستوں کا انعقاد بھی اس منصوبہ کا حصہ ہو گا۔

جماعت اہل سنت آزادکشمیر کے امیر نے پاکستان کے ایوان بالا (سینیٹ ) سے بھی پندرہ سو سالہ جشن ولادت کی قرارداد منظور کرنے پر چیئرمین سینٹ سید یوسف رضا گیلانی اور قرارداد پیش کرنے والے سینیٹر عرفان صدیقی سمیت دیگر سینیٹرز کو مبارکباد پیش کی ہے ، امیر جماعت اہل سنت علامہ سید محمداسحق نقوی نے وزیر حکومت چوہدری قاسم مجید کو آزاد جموں کشمیر قانون ساز اسمبلی میں 1500سالہ جشن ولادت خاتم النبین حضرت محمد رسول اللہ ﷺ کو سرکاری سطح پر منانے کی قرارداد کا خیر مقدم کرتے ہوئے انہیں مبارکباد پیش کی ہے ،اور حکومت آزاد کشمیر سے بھی اپیل کی ہے کہ اس عظیم موقع کو سرکاری سطح پر منانے کے لیے خصوصی اقدامات کیے جائیں،سینٹ کی طرح آزادکشمیر قانون ساز اسمبلی میں بھی رسول اللہ ﷺ کی ولادت باسعادت کے 1500سال مکمل ہونے پرچوہدری قاسم مجید کی پیش کردہ قرارداد کو متفقہ طور پر منظور کرتے ہوئے قانونی شکل دی جائے ، 1500ویں جشن عید میلادالنبی ﷺ کی تاریخی و روحانی اہمیت کے پیش نظر اعلیٰ سطح کے قومی پروگرامات منعقد کیے جائیں سرکاری ونیم سرکاری عمارتوں پرچراغاں سجاوٹ کا اہتمام کیا جائے اورقومی وریاست اخبارات میں تشہیر کی جائے ، تاکہ پوری دنیا کو یہ پیغام دیا جا سکے کہ اہلِ کشمیر محبتِ رسول ﷺ میں کسی سے پیچھے نہیں۔

انہوں نے علمائے کرام، مشائخ عظام، مدارس، خانقاہیں، اور عوام الناس سے اپیل کی گئی ہے کہ وہ اس سال کو صرف تقاریر اور جلسوں تک محدود نہ رکھیں بلکہ اپنی عملی زندگیوں کو سیرتِ محمدی ﷺ کا پیکر بنائیں، تاکہ یہ سال واقعی ''نورِ رسالت ﷺ کے فروغ کا سال'' بن جائے۔