سعودی کابینہ کی اسرائیلی وزیر اعظم کی گریٹر اسرائیل پالیسی کی مذمت، فلسطین کی حمایت کا اعادہ

بدھ 20 اگست 2025 11:00

ریاض (اُردو پوائنٹ اخبارتازہ ترین - اے پی پی۔ 20 اگست2025ء) سعودی کابینہ نے بین الاقوامی برادری خصوصا سلامتی کونسل کے مستقل ارکان پر زور دیا ہے کہ وہ فلسطینی عوام اور مقبوضہ علاقوں کے خلا ف اسرائیلی جرائم کو رکوانے کےلیے فوری اقدامات کریں۔اردو نیوز کےمطابق کابینہ کا اجلاس نیوم میں ولی عہد شہزادہ محمد بن سلمان کی زیر صدارت ہوا، جس میں علاقائی اور بین الاقوامی صورتحال کا جائزہ لیا گیا۔

سعودی ولی عہد نے امارات کے صدر، جنوبی کوریا کے صدر اور اٹلی کی وزیراعظم کے ساتھ ہونے والے ٹیلی فونک رابطوں اور سیر الیون کے صدر کی جانب سے موصول ہونے والے مکتوب کے بارے میں آگاہ کیا۔ اجلاس کے بعد قائم مقام وزیر اطلاعات نے بتایا کہ کابینہ نے اسرائیلی وزیراعظم نیتن یاہو کے نام نہادگریٹر اسرائیل وژن کے حوالے سے بیانات کی مذمت کی، اسرائیلی حکام کے توسیع پسندانہ خیالات اور آباد کاری کے منصوبوں کو مسترد کیا ہے۔

(جاری ہے)

کابینہ نے مقبوضہ بیت المقدس کے اطراف بستیوں کی تعمیر کے منصوبے کی بھی مذمت کی۔ اجلاس نے بین الاقوامی قوانین کی بنیاد پر فلسطینی عوام کے اپنی سرزمین پر آزاد اور خود مختار ریاست کے قیام کے تاریخی اور قانونی حق پر مملکت کے ٹھوس موقف کی توثیق کی۔اجلاس نے روس، یوکرین کے بحران کو پر امن طریقوں سے حل کرنے کےلیے تمام سفارتی کوششوں کی حمایت کا اعادہ کیا۔کابینہ نے اس حوالے سے امریکی صدرڈونلڈ ٹرمپ کی روس کے صدر ولادیمیرپیوٹن، یوکرین کے صدروولودیمیر زیلنسکی اور یورپی رہنماوں کی ملاقاتوں کا بھی خیرمقدم کیا۔