مون سون بارشوں کا موجودہ اسپیل قدرے زیادہ مضبوط ، ریسکیو و ریلیف ادارے فیلڈ میں موجود رہیں، ڈی جی پی ڈی ایم اے

لاہور (اُردو پوائنٹ اخبارتازہ ترین - اے پی پی۔ 20 اگست2025ء) وزیر اعلی پنجاب کی ہدایات کے پیش نظر پی ڈی ایم اے کی مون سون فلڈ کی صورتحال بارے فیکٹ شیٹ جاری کردی گئی۔ترجمان پی ڈی ایم اے کے مطابق گزشتہ 24 گھنٹوں میں نارووال 94 ملی میٹر، سرگودھا 54، جوہرآباد 39، شیخوپورہ 36، مری 18، فیصل آباد 31، کوٹ ادو 10 اور نورپور تھل میں 9 ملی میٹر تک بارش ریکارڈ کی گئی۔

اسی طرح صوبائی دارالحکومت لاہور ، گجرانوالہ، راولپنڈی، سیالکوٹ، میانوالی، جھنگ، ملتان اور مندی بہاوالدین میں بھی بارشیں ریکارڈ ہوئیں۔ ترجمان کے مطابق 22 اگست تک پنجاب کے بیشتر اضلاع میں شدید بارشوں کی پیشگوئی ہے جبکہ بالائی پنجاب کے اضلاع میں طوفانی بارشوں اور کلاڈ برسٹنگ کے خدشات ہیں۔ ڈی جی پی ڈی ایم اے عرفان علی کاٹھیا نے کہا ہے کہ مون سون بارشوں کا موجودہ اسپیل قدرے زیادہ مضبوط ہے جس میں طوفانی بارشوں کی پیشگوئی ہے ۔

(جاری ہے)

ڈی جی پی ڈی ایم اے نے ولنرایبل اضلاع کو ہائی الرٹ رہنے کی ہدایات جاری کر دی ہیں۔انہوں نے کہا کہ بارش کے دوران ریسکیو و ریلیف ادارے فیلڈ میں موجود رہیں۔ڈی جی پی ڈی ایم اے نے کہا کہ دریائے سندھ میں تربیلا اور کالاباغ کے مقام پر نچلے درجے کی سیلابی صورتحال ہے۔دریائے سندھ میں تونسہ اور چشمہ کے مقام پر درمیانے درجے کی سیلابی صورتحال ہے۔

دریائے ستلج میں گنڈا سنگھ والا اور سلیمانکی کے مقام پر نچلے درجے کا سیلاب ہے۔دریائے چناب، جہلم اور راوی میں پانی کا بہاو نارمل سطح پر ہے۔رودکوہیوں اور بڑے دریاوں سے ملحقہ ندی نالوں میں بھی پانی کا بہاو نارمل سطح پر ہے۔ ڈی جی عرفان علی کاٹھیا نے کہا کہ تربیلا ڈیم 98 فیصد جبکہ منگلا ڈیم 74 فیصد تک بھر چکاہے۔ بھارتی ڈیمز میں پانی کی سطح 70 فیصد تک ہے۔

انہوں نے شہریوں سے اپیل کی کہ موسم برسات میں احتیاطی تدابیر اختیار کریں۔ بچوں کا خیال رکھیں انہیں برساتی نالوں نشیبی علاقوں دریاوں اور نہروں میں ہرگز مت نہانے دیں۔ڈی جی عرفان علی کاٹھیا نے کہا کہ گزشتہ 24 گھنٹوں میں پنجاب میں مون سون بارشوں کے باعث کوئی جانی و مالی نقصان رپورٹ نہیں ہوا ۔رواں سال 165 شہری جاں بحق، 584 زخمی، 220 گھر متاثر اور 121 مویشی ہلاک ہوئے ۔انہوں نے کہا کہ وزیر اعلی پنجاب کی ہدایات کے پیشِ نظر متاثرہ فیملیز کو مالی معاونت فراہم کی جا رہی ہے۔