سعودی عرب کی جانب سے خیبرپختونخوا کے سیلاب متاثرین کیلئے امداد روانہ

سعودی قیادت مشکل کی گھڑی میں پاکستانی عوام کیساتھ ہے،سعودی سفیر

بدھ 20 اگست 2025 19:55

اسلام آباد (اُردو پوائنٹ اخبارتازہ ترین - این این آئی۔ 20 اگست2025ء)سعودی ایمبسی کے تعاون سے خیبر پختونخوا کے سیلاب سے متاثرہ علاقوں کیلئے انسانی ہمدردی کی بنیاد پر امداد روانہ کردی گئی۔ بدھ کو ا سلام آباد کے سپورٹس کمپلیکس میں اس حوالے سے ایک خصوصی تقریب منعقد ہوئی جس میں سعودی عرب کے سفیر اور وفاقی وزیر برائے بین الصوبائی رابطہ رانا ثنا اللہ شریک ہوئے۔

تقریب کا اہتمام کنگ سلمان ہیومینیٹرین اینڈ ریلیف سینٹر کی جانب سے کیا گیا، سعودی سفیر نواف سعید المالکی نے تقریب سے خطاب کرتے ہوئے کہا کہ سعودی ولی عہد محمد بن سلمان نے حالیہ سیلاب سے متاثرہ پاکستانی عوام کے لیے افسوس اور ہمدردی کا اظہار کیا ہے۔ان کا کہنا تھا کہ سعودی فرمانروا اور وزیر اعظم کی ہدایت پر امدادی سامان روانہ کیا جا رہا ہے جو اس بات کا ثبوت ہے کہ سعودی عوام اور قیادت مشکل وقت میں پاکستان کے عوام کے ساتھ کھڑے ہیں۔

(جاری ہے)

وفاقی وزیر رانا ثنا اللہ نے تقریب سے خطاب میں کہا کہ سعودی عرب نے ہمیشہ مشکل وقت میں پاکستان کا ساتھ دیا۔ انہوں نے بتایا کہ کنگ سلمان ریلیف سینٹر نے دس ہزار فوڈ کٹس اور دس ہزار شیلٹر کٹس این ڈی ایم اے کے حوالے کی ہیں جو متاثرہ خاندانوں کی فوری ضروریات پوری کرنے کیلئے کافی ہوں گی۔انہوں نے کہا کہ حکومت پاکستان اور عوام سعودی قیادت اور عوام کے شکرگزار ہیں۔امداد کا یہ سلسلہ اس وقت تک جاری رہے گا جب تک متاثرہ افراد باعزت طریقے سے اپنے گھروں کو واپس نہیں لوٹ جائے۔