:کیلی فورنیا کی سینٹ میں پاکستان اور پاکستانی امریکی کمیونٹی کی خدمات کے حوالے سے تاریخی قرارداد متفقہ طور پر منظور

ٰپاکستانی سفیر کی پاک امریکہ تعلقات کے فروغ کے حوالے سے سینیٹر میلیسا ہرٹاڈو کی خدمات کی تعریف

بدھ 20 اگست 2025 23:20

kواشنگٹن(اُردو پوائنٹ اخبارتازہ ترین - آن لائن۔ 20 اگست2025ء) یوم جشن آزادی پاکستان کے موقع پر امریکی ریاست کیلی فورنیا کی سینیٹ کی جانب سے پاک امریکہ تعلقات اور ریاست کیلی فورنیا کی معیشت ، معاشرے اور ثقافتی تانے بانے میں پاکستانی نڑاد کمیونٹی کی خدمات کے اعتراف میں ایک تاریخی قرارداد متفقہ طور پر منظور کی گئی ہے۔قرارداد سینیٹر میلیسا ہرٹاڈو کی جانب سے متعارف کرائی گئی۔

سینیٹر ہرٹادو کیلیفورنیا سینٹ کی سب سے کم عمر خاتون منتخب رکن ہیں اور سینیٹ کمیٹی برائے زراعت کی چیئرمین ہیں۔ قرارداد پاکستان اور امریکہ کے درمیان دیرینہ اور کثیر جہتی تعلقات کو اجاگر کرتی ہے اور دنیا کی چوتھی سب سے بڑی معیشت کیلیفورنیا کی ترقی میں پاکستانی نڑاد امریکیوں کے اہم کردار کا اعتراف کرتی ہے۔

(جاری ہے)

سینیٹر میلیسا ہرٹاڈو نے تاریخی قرارداد پیش کرتے ہوئے اپنے ریمارکس میں پاک امریکہ تعلقات کو اجاگر کرتے ہوئے پاکستانی کمیونٹی کی خدمات کو سراہتے ہوئے کہا کہ اس کمیونٹی کی کہانی قربانی، وقار اور استقامت سے عبارت ہے۔

ریاستی سینٹ میں منظور شدہ قرارداد پاکستانی-امریکیوں، خاص طور پر نوجوان نسل کی اپنی ثقافت سے وابستگی کو اجاگر کرتی ہے۔ قرارداد ان شخصیات اور تنظیموں کی خدمات کو بھی سراہتی ہے جنہوں نے پاکستانی-امریکی ثقافت، روایات اور کامیابیوں کو فروغ دیا ہے۔سینیٹر ہرٹاڈو نے زور دیا کہ پاک امریکہ پارٹنرشپ مشترکہ اقدار، جمہوریت، انسانی وقار پر استوار ہے۔

سینیٹ میں سفیر پاکستان رضوان سعید شیخ کی موجودگی کو خوش آمدید کہتے ہوئے سینیٹر ہرٹاڈو نے پاک امریکہ تعلقات کے فروغ کے حوالے سے سفیر پاکستان کا شکریہ ادا کیا۔ریاستی سینٹ میں بھرپور پذیرائی اور خصوصا تاریخی قرارداد پیش کرنے اور اسے متفقہ طور پر منظور کروانے پر سفیر پاکستان رضوان سعید شیخ نے سینیٹر میلیسا اور کونسل آف پاکستان کی کاوشوں کو سراہا۔

انہوں نے پاک امریکہ تعلقات اور عوامی روابط کو مزید مضبوط بنانے کے حوالے سے اپنے عزم کا اظہار کیا۔سفیر پاکستان نے کہا کہ کیلیفورنیا سینیٹ کی جانب سے پاکستان کے 79ویں یوم آزادی کے موقع پر قرارداد کی متفقہ منظوری ہمارے مضبوط تعلقات کی عکاس ہے جو حکومتی سطح سے بڑھ کر ہمارے دونوں ممالک کے عوام کے درمیان پائے جاتے ہیں۔ریاست کیلی فورنیا کو "گولڈن سٹیٹ" کے نام سے جانا جاتا ہے جو ایک عالمی اقتصادی پاور ہاؤس اور ثقافتی تنوع کے مرکز کے طور پر ترقی کر رہی ہے۔ ریاست کی تعمیر و ترقی میں پاکستانی نڑاد امریکی اپنا بھرپور حصہ ڈال رہے ہیں