کشمیریوں کو بھارتی ریاستی دہشت گردی کا مسلسل سامنا،گزشتہ 37سال میں 96ہزار465 کشمیری شہید

جمعرات 21 اگست 2025 11:51

سری نگر (اُردو پوائنٹ اخبارتازہ ترین - اے پی پی۔ 21 اگست2025ء) بھارت کے غیر قانونی زیر تسلط جموں وکشمیر کے لوگوں کو مسلسل بھارتی ریاستی دہشت گردی کا سامنا ہے۔ یہ بات کشمیر میڈیا سروس کے شعبہ تحقیق کی جانب سے ” دہشت گردی کے متاثرین کویاد کرنے اور انہیں خراج عقیدت پیش “کرنے کے دن پر جاری رپورٹ میں کہی گئی۔ رپورٹ کے مطابق نریندر مودی کی زیر قیادت بھارتی حکومت نے 5اگست 2019 کو مقبوضہ علاقے کی خصوصی حیثیت ختم کر نے کے بعد علاقے میں اپنی ریاستی دہشت گردی اور سیاسی ناانصافیوں کا سلسلہ تیز کردیا ہے۔

رپورٹ میں کہا گیا ہے کہ بھارتی فورسز نے جنوری 1989 سے اب تک 96ہزار465 کشمیریوں کو شہید کیا ہے جن میں خواتین اور بچے بھی شامل ہیں۔ قابض بھارتی فورسز نے اس عرصے کے دوران 8ہزار سے زائد کشمیریوں کو دوران حراست لاپتہ کیا ہے۔

(جاری ہے)

بھارتی دہشت گردی کے باعث 22ہزار 986خواتین بیوہ جبکہ ایک لاکھ 7ہزار 985بچے یتیم ہوئے جبکہ گزشتہ37 برسوں میں ایک ہزار273 خواتین کو بے حرمتی کا نشانہ بنایا گیا۔

رپورٹ میں افسوس کا اظہار کیا گیا کہ کشمیری گزشتہ 78 سالوں سے ناقابل بیان مظالم برداشت کر رہے ہیں۔ کشمیری بھارتی فوجی قبضے، اس کی ریاستی دہشت گردی اور سیاسی ناانصافیوں کا شکار ہیں۔ علاقے میں ہر عمر اور جنس کے لوگوں کو انتہائی ظلم و جبر کا نشانہ بنایا جاتا ہے۔کے ایم ایس رپورٹ میں کہا گیا کہ 2014 میں مودی اور امیت شاہ کی قیادت میں بی جے پی کے اقتدار میں آنے کے بعد سے کشمیر میں مسلم مخالف نفرت نئی بلندیوں پر پہنچ گئی ہے، تاہم بھارتی جبر کشمیریوں کے عزم کو کچلنے میں ناکام رہا ہے اور وہ بھارتی تسلط سے آزادی حاصل کرنے کے لئے پرعزم ہیں۔

رپورٹ میں کہا گیا کہ علاقے میں سیاسی، سماجی اور انسانی حقوق کے کارکنوں کے خلاف انتقامی کارروائیوں کا سلسلہ بدستور جاری ہے اور ان کے خلاف پرانے مقدمات بھی دوبارہ کھولے جار رہے ہیں۔لوگوں کو بار بار تھانوں میں بلایا جاتا ہے، ہراساں کیا جاتاہے اور ان کی تذلیل کی جاتی ہے۔رپورٹ میں عالمی برادری پر زور دیا گیا کہ وہ بھارت کے غیر قانونی زیر تسلط جموں وکشمیر میں انسانیت کے خلاف جاری سنگین بھارتی جرائم کا نوٹس لے اور نریندر مودی اور ان کے ساتھیوں کو انصاف کے کٹہرے میں لائے۔