وفاقی وزیر تجارت کی بنگلہ دیشی مشیر صنعت سے ملاقات، صنعتی تعاون بڑھانے پر اتفاق

جمعرات 21 اگست 2025 16:47

ڈھاکہ (اُردو پوائنٹ اخبارتازہ ترین - اے پی پی۔ 21 اگست2025ء) وفاقی وزیر تجارت جام کمال خان نے جمعرات کو ڈھاکا میں بنگلہ دیش کے مشیر برائے صنعت، عادل الرحمٰن خان سے ملاقات کی۔ جمعرات کو جاری پریس ریلیز کے مطابق ملاقات میں دوطرفہ صنعتی تعاون، سرمایہ کاری اور تجارت کے فروغ کے مختلف پہلوؤں پر تفصیلی گفتگو کی گئی۔ پاکستان کے ہائی کمشنر برائے بنگلہ دیش عمران حیدر بھی اس موقع پر موجود تھے۔

ملاقات میں دونوں رہنماؤں نے زور دیا کہ پاکستان اور بنگلہ دیش اپنی صنعتی اور معاشی صلاحیتوں کو باہمی فائدے کے لیے بروئے کار لائیں ۔ ملاقات میں فوڈ سکیورٹی، فوڈ ویلیو ایڈیشن اور صنعتی ٹیکنالوجی کے تبادلے کو اہم شعبوں کے طور پر اجاگر کیا گیا۔ دونوں ممالک نے ماہرین اور وفود کے تبادلوں کے ذریعے علم اور تجربات کے اشتراک پر بھی اتفاق کیا۔

(جاری ہے)

وفاقی وزیر تجارت جام کمال خان نے کہا کہ پاکستان، بنگلہ دیش کے صنعتی شعبے میں تعاون، مشترکہ منصوبوں اور سرمایہ کاری کا خواہاں ہے۔ انہوں نے کہا کہ دونوں ممالک کو ایک مشترکہ وژن کے تحت ایسا سازگار معاشی ماحول پیدا کرنا ہوگا جو صنعتی ترقی میں مددگار ہو۔ انہوں نے بنگلہ دیش کی دواسازی، ٹیکسٹائل اور آئی ٹی سیکٹر میں نمایاں کامیابیوں کو سراہا۔بنگلہ دیشی مشیر صنعت نے اپنے ملک کی صنعتی ترقی اور بڑھتی ہوئی ضروریات پر روشنی ڈالی اور پاکستان کے ساتھ تعاون میں گہری دلچسپی کا اظہار کیا۔ انہوں نے چمڑے کی صنعت، جہاز سازی، شوگر انڈسٹری، زرعی پراسیسنگ اور ایس ایم ایز کو ممکنہ تعاون کے شعبے قرار دیا۔\932