پاکستان غربت کے خاتمے اور ماحولیاتی چیلنجز کے سے نمٹنے کیلئے متحدہ عرب امارات کے ساتھ شراکت داری کا خواہاں ہے،چیئرمین سینیٹ

جمعرات 21 اگست 2025 18:05

اسلام آباد (اُردو پوائنٹ اخبارتازہ ترین - این این آئی۔ 21 اگست2025ء)چیئرمین سینیٹ سید یوسف رضا گیلانی نے کہا ہے کہ پاکستان غربت کے خاتمے اور ماحولیاتی چیلنجز کے سے نمٹنے کیلئے متحدہ عرب امارات کے ساتھ شراکت داری کا خواہاں ہے،پاک-جی سی سی فری ٹریڈ ایگریمنٹ سے تجارت اور سرمایہ کاری میں وسعت آئے گی۔جمعرات کو سینٹ سیکرٹریٹ سے جاری کردہ بیان کے مطابق چیئرمین سینیٹ سید یوسف رضا گیلانی سے متحدہ عرب امارات کے سفیرنے الوداعی ملاقات کی۔

چیئرمین سینیٹ نے سفیر حماد عبید ابراہیم الزعابی کی خدمات کو خراجِ تحسین پیش کیا۔

(جاری ہے)

چیئرمین سینیٹ نے کہا کہ پاکستان اور یو اے ای کے تعلقات پانچ دہائیوں پر محیط ہیں، یو اے ای کے ساتھ معاشی اور اقتصادی تعلقات مزید بڑھانا چاہتے ہیں،انہوں نے یو اے ای کی قیادت کو خراج تحسین کیا۔ چیئرمین سینیٹ نے کہا کہ پاکستان غربت کے خاتمے اور ماحولیاتی چیلنجز کے لیے یو اے ای کے ساتھ شراکت داری کا خواہاں ہے، دونوں ممالک کے مابین تجارتی تعلقات میں مسلسل اضافہ خوش آئندہے،حالیہ ایم او یوز پر عمل درآمد سے تعاون مزید مضبوط ہوگا، چیئرمین سینیٹ نے کہا کہ پاک-جی سی سی فری ٹریڈ ایگریمنٹ سے تجارت اور سرمایہ کاری میں وسعت آئیگی،1.8 ملین پاکستانی دونوں ممالک کے درمیان مضبوط پل ہیں۔