Live Updates

چیف جسٹس سے ملاقات سنہرا موقع تھا جس سے بھرپور فائدہ اٹھا کر عمران خان کے کیسز کا معاملہ اٹھایا، سلمان صفدر

جمعرات 21 اگست 2025 19:25

اسلام آباد (اُردو پوائنٹ اخبارتازہ ترین - این این آئی۔ 21 اگست2025ء)بانی پی ٹی آئی عمران خان کے وکیل سلمان صفدر نے کہا ہے کہ چیف جسٹس یحییٰ آفریدی سے ملاقات سنہرا موقع تھا جس سے بھرپور فائدہ اٹھایا اور عمران خان کے کیسز کا معاملہ اٹھایا۔چیف جسٹس سے ملاقات کے بعد میڈیا سے گفتگو کرتے ہوئے سلمان صفدر نے کہا کہ چیف جسٹس سے چیمبر میں ملاقات ہوئی جس میں سپیشل پراسیکیوٹر ذوالفقار نقوی اور پنجاب پراسکیوشن ڈیپارٹمنٹ کے وکیل بھی شریک تھے۔

انہوں نے کہا کہ چیف جسٹس سے بانی پی ٹی آئی اور ان کی اہلیہ کو جیل سہولیات نہ ملنے کے بارے میں آگاہ کیا۔چیف جسٹس کہا کہ جیل سہولیات کا معاملہ قومی عدالتی پالیسی ساز کمیٹی کی ترجیح ہے، جیل اصلاحات سے متعلق معاملہ کمیٹی میں پہلے سے ہی زیر غور ہے۔

(جاری ہے)

انہوں نے کہا کہ اسلام آباد ہائی کورٹ میں بانی پی ٹی آئی مقدمات کی سماعت نہ ہونے کا معاملہ چیف جسٹس کے سامنے اٹھایا، چیف جسٹس سے ملاقات سنہرا موقع تھا جس سے بھرپور فائدہ اٹھایا۔

سلمان صفدر نے کہا کہ چیف جسٹس پاکستان سے ملاقات میں بانی پی ٹی آئی کے توسط سے تحفظات رکھے، چیف جسٹس پاکستان کو جیل مینول کی خلاف ورزی اور بانی پی ٹی آئی کیساتھ ناروا سلوک بارے آگاہ کیا۔انہوں نے کہا کہ 300سے زائد مقدمات بانی پی ٹی آئی پر مجموعی طور پر بنائے گئے، بانی پی ٹی آئی کیخلاف مقدمات کم نہیں رہے گئے بلکہ صرف ایک کیس رہ گیا ہے، میں نے چیف جسٹس پاکستان سے کہا کہ اسلام آباد ہائیکورٹ میں ہمارے کیسز نہیں لگ رہے۔

سلمان صفدر نے کہا کہ بانی پی ٹی آئی عمران خان کیساتھ ہائی کورٹ میں غیر مساوی سلوک کے بارے میں چیف جسٹس پاکستان کو آگاہ کیا۔انہوں نے کہا کہ آج عمران خان کو 8کیسز میں ضمانت ملی، القادر ٹرسٹ کیس ان کے خلاف ایک اور آخری ہے جس کی سماعت 15منٹ میں ختم ہوجائے گی ،مجھے لگتا ہے اس کی سماعت جلد ہوگی۔