Live Updates

وسیم اکرم نے اپنی کامیابیوں کا کریڈٹ سابق کپتان عمران خان کو دے دیا

عمران خان کھلاڑیوں سے 100 فیصد کارکردگی چاہتے تھے، سست روی برداشت نہیں کرتے تھے، اگر کوئی کھلاڑی میدان میں سست ہوتا تو وہ ڈانٹ دیتے تھے لیکن اگر آپ نے پوری محنت کی ہو اور نتیجہ اچھا نہ نکلے تو وہ اسے تسلیم کرتے تھے: لیجنڈری فاسٹ بالر

ذیشان مہتاب جمعہ 22 اگست 2025 11:27

وسیم اکرم نے اپنی کامیابیوں کا کریڈٹ سابق کپتان عمران خان کو دے دیا

لاہور (اردو پوائنٹ تازہ ترین اخبار ۔ 22 اگست 2025ء ) پاکستان کے لیجنڈری فاسٹ بولر اور سوئنگ کے سلطان وسیم اکرم نے ورلڈکپ فاتح سابق کپتان اور سابق وزیر اعظم عمران خان کو سب سے بہترین کپتان قرار دے دیا۔

سابق انگلش کرکٹرز مائیکل وان، سر الیسٹر کُک، ڈیوڈ لائیڈ اور فل ٹفنل کے پوڈکاسٹ Stick To Cricket میں گفتگو کرتے ہوئے وسیم اکرم نے کہا، ’عمران خان بلاشبہ ان کے سب سے بہترین کپتان تھے لیکن وہ قدرتی طور پر اتنے باصلاحیت نہیں تھے، بلکہ اپنی محنت اور عزم سے کامیابی حاصل کی۔

‘

وسیم اکرم نے کہا کہ ’میں نے کرکٹ میں جو کچھ کیا، میدان میں اور میدان سے باہر، اس کا کریڈٹ عمران خان کو جاتا ہے، وہ ہمیشہ ہمیں اعتماد دیتے، فرنٹ سے لیڈ کرتے اور اپنی صلاحیتوں پر یقین رکھتے تھے۔

(جاری ہے)

‘

ان کا مزید کہنا تھا کہ لوگ مجھے قدرتی ٹیلنٹڈ بالر کہتے تھے، لیکن عمران خان کی کامیابی سخت محنت کی مرہونِ منت تھی، کپتان قدرتی ٹیلنٹڈ نہیں تھے، انہوں نے محنت سے سب کچھ حاصل کیا، 1976ء میں اپنی بالنگ ایکشن ہی بدل ڈالا، جو انتہائی مشکل کام ہے لیکن وہ اتنے پُرعزم تھے کہ کر دکھایا۔

59 سالہ سابق فاسٹ بالر نے مزید کہا کہ عمران خان ٹیم کے کھلاڑیوں سے 100 فیصد کارکردگی چاہتے تھے اور سست روی برداشت نہیں کرتے تھے، اگر کوئی کھلاڑی میدان میں سست ہوتا تو وہ ڈانٹ دیتے تھے لیکن اگر آپ نے پوری محنت کی ہو اور نتیجہ اچھا نہ نکلے تو وہ اسے تسلیم کرتے تھے‘۔

View this post on Instagram

یاد رہے کہ وسیم اکرم نے 1984ء میں ڈیبیو کیا تھا، اس دوران عمران خان نے ہر قدم پر نوجوان فاسٹ بالر کی رہنمائی کی اور انہیں دنیا کے بہترین گیند بازوں میں شامل ہونے کا موقع دیا۔

بعد ازاں پاکستان نے 1992ء میں عمران خان کی قیادت میں پہلا اور واحد ون ڈے ورلڈکپ جیتا تھا اور وسیم اکرم اس ایونٹ کے فائنل کے مین آف دا میچ بھی قرار پائے۔