جموں وکشمیر تنظیم نو ترمیمی بل جمہوریت کو کچلنے کی ایک کوشش ہے ، نائب وزیر اعلیٰ سریندر چوہدری

جمعہ 22 اگست 2025 11:44

سرینگر (اُردو پوائنٹ اخبارتازہ ترین - اے پی پی۔ 22 اگست2025ء) بھارت کے غیر قانونی زیر تسلط جموں و کشمیر کے نائب وزیر اعلیٰ سریندر چوہدری نے ہندوتوا بھارتیہ جنتا پارٹی کو کڑی تنقید کا نشانہ بناتے ہوئے کہا کہ مودی حکومت کی طرف سے متعارف کرایاگیا جموں و کشمیر تنظیم نو ترمیمی بل جمہوریت کو کچلنے کی ایک کوشش ہے ۔کشمیرمیڈیاسروس کے مطابق سریندر چوہدری نے پلوامہ کے علاقے لاسی پورہ میں انڈسٹریل گروتھ سینٹر کا دورے کے دوران صحافیوں سے بات کرتے ہوئے اس قانون کا موازنہ برصغیر میں ایسٹ انڈیا کمپنی کے داخلے سے کیا۔

(جاری ہے)

انہوں نے کہاکہ ایسٹ انڈیا کمپنی نے برصغیر آکر وہاں 200 سال حکومت کی۔ بی جے پی انہی حربوں کو دہرانے کی کوشش کر رہی ہے۔انہوں نے مودی حکومت کی طرف سے وزیروں کو 30دن کےلئے جیل کرحزب اختلاف کی منتخب حکومتوں کو گرانے کےلئے متعارف کرائے گئے بل کو غیر جمہوری قراردیا۔انہوں نے کہا کہ یہ بل جمہوریت کو کچلنے کی ایک کوشش ہے۔ انہوں نے کہاکہ عوام مودی حکومت کو ملک میں جمہوریت کو پامال کرنے کی ہرگز اجازت نہیں دیں گے۔عوامی خدشات کو تسلیم کرتے ہوئے نائب وزیراعلیٰ نے کہاکہ جموں و کشمیر کی ریاستی شناخت ختم ہونے کے بعد ترقی کا عمل سست پڑ گیا ہے۔