علیمہ خان کے بیٹے شاہ ریزعظیم کا 8 روزہ جسمانی ریمانڈ منظور

ملزم 9 مئی کے جناح ہاؤس حملہ کیس میں نامزد ہے، فون اور دیگر چیزیں ابھی ریکور کرنی ہیں، پولیس کا عدالت میں موٴقف

فیضان ہاشمی جمعہ 22 اگست 2025 14:24

علیمہ خان کے بیٹے شاہ ریزعظیم کا 8 روزہ جسمانی ریمانڈ منظور

لاہور (اُردو پوائنٹ اخبارتازہ ترین۔ 22 اگست2025ء)علیمہ خان کے بیٹے شاہ ریز عظیم کو 9 مئی کے جلاؤ گھیراؤ کیس میں انسدادِ دہشت گردی عدالت میں پیش کر دیا گیا۔ عدالت نے پولیس کی استدعا منظور کرتے ہوئے شاہ ریز کا 8 روزہ جسمانی ریمانڈ دے دیا۔ شاہ ریز عظیم کو لاہور کی انسداد دہشت گردی عدالت میں پیش کیا گیا جہاں ان کے کیس کی سماعت خصوصی عدالت کے جج منظر علی گل نے کی۔

پولیس نے مؤقف اختیار کیا کہ ملزم کو 9 مئی کے جناح ہاؤس حملہ کیس میں ضمنی بیان میں نامزد کیا گیا، ملزم کو کل گرفتار کیا، جس سے فون اور دیگر چیزیں ابھی ریکور کرنی ہیں۔ ملزم کے وکیل سلمان اکرم راجہ نے سوال اٹھایا کہ 27 ماہ گزر گئے، پولیس کو اب ان کے ملوث ہونے کا پتہ چلا؟ ضمنی بیان ڈیڑھ ہزار مرتبہ عدالت میں پڑھا گیا کہیں یہ نام نہیں، کل بانی کی ضمانت ہوئی اور شام کو یہ ان کے بھانجوں کو گرفتار کرنے پہنچ گئے، بدنیتی واضح نظر آرہی ہے۔

(جاری ہے)

انہوں نے مزید کہا کہ شاہ ریز عظیم عالمی لیول کے سپورٹس مین ہیں، کئی بار یہ ملک سے باہر گئے واپس آئے، کبھی کسی مقدمہ میں طلب نہیں کیا گیا، 6 سے 13 مئی تک یہ چترال میں تھے، انہیں فی الفور نہ صرف رہا کیا جائے بلکہ ڈسچارج کیا جائے۔ سلمان اکرم راجہ نے دلائل دیتے ہوئے کہا کہ آپ نے آرڈر دے رکھا ہے کہ اتنی دیر بعد جب آپ ملزمان کو نامزد کرتے ہیں تو اس میں بدنیتی نظر آتی ہے، ان کی والدہ کو آپ پہلے بھی ڈسچارج کرچکے ہیں۔

دوسری طرف پولیس نے شاہ ریز عظیم کا 30 دن کا ریمانڈ طلب کیا ، جس پر سلمان اکرم راجہ نے کہا کہ یہ 30 دن کا ریمانڈ مانگ رہے ہیں جو زیادتی ہے۔ عدالت نے ریمارکس دیے کہ ضمنی کی فائل آجائے تو دیکھتا ہوں، پولیس نے شاہ ریز کے خلاف جناح ہاؤس کیس کا ریکارڈ عدالت میں پیش کیا، ڈی ایس پی لیگل نے بتایا کہ ملزم شاہ ریز جناح ہاؤس کیس کے علاوہ کسی اور مقدمے میں مطلوب نہیں۔ عدالت نے ریکارڈ دیکھنے اور دلائل کے بعد فیصلہ محفوظ کر لیا، بعد ازاں عدالت نے پولیس کی درخواست منظور کرتے ہوئے شاہ ریز کا آٹھ روزہ جسمانی ریمانڈ منظور کر لیا اور انہیں مزید تفتیش کے لیے پولیس کے حوالے کر دیا۔