سیلاب متاثرین کی بحالی تک سکون سے نہیں بیٹھیں گے، شہباز شریف

فیلڈ مارشل آرمی کی جانب سے ریسکیو آپریشن کو خود مانیٹر کر رہے ہیں، ریسکیو آپریشن اور ری ہیبلی ٹیشن کا کام جاری ہے، وفاقی کابینہ کے اجلاس سے خطاب

فیضان ہاشمی جمعہ 22 اگست 2025 16:45

سیلاب متاثرین کی بحالی تک سکون سے نہیں بیٹھیں گے، شہباز شریف

اسلام آباد(اُردو پوائنٹ اخبارتازہ ترین۔ 22 اگست2025ء) وزیراعظم شہباز شریف نے کہا ہے کہ حکومت سیلاب متاثرین کی بحالی اور تعمیر نو مکمل ہونے تک سکون سے نہیں بیٹھے گی۔ میں نے بارشوں سے متاثرہ علاقے بونیر کا دورہ کیا، جہاں بے پناہ نقصان ہوا،وفاقی کابینہ کے اجلاس سے خطاب میں ان کا کہنا تھا کہ حالیہ طوفانی بارشوں کے باعث دریاؤں میں شدید طغیانی آئی، جس سے سوات، صوابی، مانسہرہ اور شانگلہ سمیت کئی اضلاع میں بھاری نقصانات ہوئے۔

انہوں نے کہا کہ خیبرپختونخوا میں سیلاب اور کلاؤڈ برسٹ کے نتیجے میں بڑے پیمانے پر جانی اور مالی نقصان سامنے آیا ہے۔ وزیراعظم نے کہا کہ جنگلات کی کٹائی کی وجہ سے نقصانات ہوئے، حالیہ قدرتی آفت میں 700 سے زیادہ اموات ہوئیں، صرف خیبرپختونخوا میں 400 سے زائد اموات ہوئیں، 2022 کے سیلاب میں معاشی نقصان بہت ہوا، 2022 کے سیلاب میں صوبہ سندھ بہت متاثر ہوا۔

(جاری ہے)

میں نے بونیر کا دورہ کیا، جہاں بے پناہ نقصان ہوا، آفت کی اس گھڑی میں وفاق نے صوبائی حکومت ساتھ مل کر کام کیا، وفاقی وزراء نے امدادی کاموں میں بھرپور حصہ لیا۔ شہباز شریف نے کہا کہ این ڈی ایم اے نے متاثرہ علاقوں میں امدادی سامان بھجوایا، افواج پاکستان امدادی کاموں میں بھرپور حصہ لے رہی ہیں، پاک آرمی نے شدید متاثرہ علاقوں میں پہنچ کر لوگوں کو باہر نکالا، فیلڈ مارشل آرمی کی جانب سے ریسکیو آپریشن کو خود مانیٹر کر رہے ہیں۔ ان کا کہنا تھا کہ ریسکیو آپریشن اور ری ہیبلی ٹیشن کا کام جاری ہے، جب تک بحالی کا کام مکمل نہیں ہو جاتا چین سے نہیں بیٹھیں گے، غیرقانونی تعمیرات کی روک تھام سے متعلق بہت جلد اہم اجلاس طلب کروں گا۔