بھارت کیساتھ مسئلہ کشمیر سمیت دیگر امور پر جامع مذاکرات کیلئے تیار ہیں، اسحق ڈار

جمعہ 22 اگست 2025 18:05

اسلام آباد (اُردو پوائنٹ اخبارتازہ ترین - این این آئی۔ 22 اگست2025ء)نائب وزیراعظم اور وزیر خارجہ اسحق ڈار نے واضح کیا ہے کہ پاکستان بھارت کے ساتھ مسئلہ کشمیر سمیت دیگر امور پر جامع مذاکرات کے لیے تیار ہے، پاک بھارت جنگ بندی پر عمل جاری ہے،جنگ بندی کے لیے بھارت نے امریکا سے درخواست کی تھی۔سینئر صحافیوں سے غیر رسمی گفتگو کرتے ہوئے نائب وزیراعظم اور وزیرخارجہ اسحٰق ڈار نے کہا کہ جنگ بندی کیلئے انہیں امریکا سے فون آیا تھا، جس پر انہوں نے واضح کیا تھا کہ پاکستان جنگ چاہتا ہی نہیں تھا، مارکو روبیو کا دورہ پاکستان ابھی شیڈول نہیں ہوا۔

اسحٰق ڈار نے کہا کہ ہم نے کسی سے نہیں کہا تھا کہ ہمیں بھارت کے ساتھ بٹھائیں، ہم سے کسی نیوٹرل مقام پر بٹھانے کی بات کی گئی تھی، میں نے کہا تھا کہ اگر نیوٹرل مقام پر میٹنگ ہوگی تو کرلیں گے۔

(جاری ہے)

انہوں نے کہا کہ پاکستان نے واضح کیا تھا کہ بھارت کے ساتھ کسی ایک نکاتی ایجنڈے پر بات نہیں ہوگی، بھارت کے ساتھ مسئلہ کشمیر سمیت تمام تصفیہ طلب امور پر بات ہوگی۔نائب وزیر اعظم اور وزیر خارجہ نے کہا کہ بھارت کی جانب سے بلاوجہ بیان بازی جاری رہتی ہے۔اسحق ڈار نے قرار دیا کہ امریکا کے وزیر خارجہ کا دورہ پاکستان ابھی شیڈول نہیں ہے، میں بنگلہ دیش کے دو روزہ دورے پر جا رہا ہوں، دورے کا مقصد پاکستان اور بنگلہ دیش کو مزید قریب لانا ہے۔