وزیرِتجارت کی بنگلہ دیش کے مشیر برائے تجارت سے ملاقات ، تجارتی تعلقات کے فروغ ، اقتصادی تعاون کو مستحکم بنانے پرتبادلہ خیال

جمعہ 22 اگست 2025 18:05

ڈھاکہ (اُردو پوائنٹ اخبارتازہ ترین - این این آئی۔ 22 اگست2025ء)وفاقی وزیرِ تجارت جام کمال خان نے بنگلہ دیش کے مشیر برائے تجارت شیخ بشیر الدین سے ڈھاکہ میں ملاقات کی۔ جمعہ کو جاری پریس ریلیز کے مطابق ملاقات میں دوطرفہ تجارتی تعلقات کو فروغ دینے، سرمایہ کاری بڑھانے اور اقتصادی تعاون کو مستحکم بنانے پر تفصیلی بات چیت کی گئی۔ ملاقات میں دونوں ممالک نے باہمی تجارتی تعلقات کو ادارہ جاتی فریم ورک کے تحت آگے بڑھانے پر اتفاق کیا گیا۔

اس سلسلے میں پاکستان اور بنگلہ دیش نے مشترکہ ورکنگ گروپ برائے تجارت قائم کرنے اور 2005 کے بعد غیر فعال رہنے والے مشترکہ اکنامک کمیشن کو دوبارہ فعال کرنے کا فیصلہ کیا۔ مزید برآں، ایک مشترکہ ٹریڈ کمیشن بنانے پر بھی اتفاق کیا گیا، جو مستقبل کے تجارتی روڈ میپ اور اہداف طے کرے گا۔

(جاری ہے)

دونوں رہنماؤں نے زرعی جدیدکاری، قابلِ تجدید توانائی، سٹیل انڈسٹری، شپ بلڈنگ، گرین شپ بریکنگ، حلال ٹریڈ، کھجور، چاول، معدنیات، چمڑے، شوگر، ڈیہائیڈریٹڈ فروٹس اور ایگرو پروسیسنگ سمیت متعدد شعبوں میں تعاون کے امکانات پر تبادلہ خیال کیا۔

ملاقات میں یہ بھی زور دیا گیا کہ دوطرفہ تجارت کو فروغ دینے کے لیے لاجسٹکس اور کنیکٹیوٹی کو بہتر اور کم لاگت بنایا جائے۔ٹیرف اور ڈیوٹیز میں کمی کے ساتھ ساتھ کچھ بنگلہ دیشی مصنوعات کو پاکستانی مارکیٹ تک ترجیحی رسائی دینے کے معاملے پر بھی بات ہوئی۔ فریقین نے اس بات پر اتفاق کیا کہ پاکستان اور بنگلہ دیش کے درمیان تجارتی صلاحیت بہت زیادہ ہے، جس سے دونوں ملکوں کے عوام براہِ راست فائدہ اٹھا سکتے ہیں۔