وفاقی وزیرجام کمال کی بنگلہ دیش کے مشیر برائے خوراک سے ملاقات ، زرعی شعبے میں باہمی شراکت داری کے امکانات پر تبادلہ خیال

جمعہ 22 اگست 2025 18:05

ڈھاکہ (اُردو پوائنٹ اخبارتازہ ترین - این این آئی۔ 22 اگست2025ء) وفاقی وزیرِ تجارت پاکستان جام کمال خان نے بنگلہ دیش کے مشیر برائے خوراک علی امام مجمدار سے ڈھاکہ میں ملاقات کی۔ ملاقات میں دونوں رہنماؤں نے فوڈ سیکیورٹی کے شعبے میں تعاون بڑھانے اور زرعی شعبے میں باہمی شراکت داری کے امکانات پر تبادلہ خیال کیا۔دونوں ممالک نے جنوری 2025 میں پاکستان ٹریڈنگ کارپوریشن اور بنگلہ دیش ڈائریکٹوریٹ جنرل آف فوڈ کے درمیان ہونے والے چاول کی تجارت کے معاہدے پر اطمینان کا اظہار کیا۔

اس معاہدے کے تحت پاکستان نے کامیابی کے ساتھ 50 ہزار میٹرک ٹن چاول فراہم کیے۔ فریقین نے اس بات پر اتفاق کیا کہ یہ معاہدہ حکومتی اور کاروباری وفود کے باقاعدہ تبادلوں کے لیے راستہ ہموار کرے گا تاکہ ضروری اشیاء کی تجارت میں اضافہ ہو سکے۔

(جاری ہے)

وفاقی وزیر نے اس موقع پر کہا کہ نومبر 2025 میں کراچی میں ہونے والی تیسری بین الاقوامی فوڈ اینڈ ایگریکلچر نمائش (فوڈ ایگ) بنگلہ دیشی کاروباری حضرات اور حکام کو پاکستان کی زرعی استعداد کو قریب سے دیکھنے کا موقع فراہم کرے گی۔

وزیر اور مشیر دونوں نے اس بات پر زور دیا کہ بڑھتی ہوئی فوڈ ڈیمانڈ کو پورا کرنے کے لیے فصلوں کی پیداوار بڑھانے اور جدید زرعی طریقے اپنانے کی ضرورت ہے۔ ملاقات ایک مثبت عزم کے ساتھ ختم ہوئی کہ دونوں ممالک مل کر فوڈ سیکیورٹی کے شعبے میں تعاون کو مزید مستحکم کریں گے۔