علیمہ خان کا دوسرا بیٹا شیر شاہ خان بھی گرفتار

شیر شاہ کو 9 مئی کے کیسز میں حراست میں لیا گیا، معاملے کی تحقیقات کر رہے ہیں، ایس ایس پی انویسٹی گیشن

فیضان ہاشمی جمعہ 22 اگست 2025 14:42

علیمہ خان کا دوسرا بیٹا شیر شاہ خان بھی گرفتار

لاہور(اُردو پوائنٹ اخبارتازہ ترین۔ 22 اگست2025ء) علیمہ خان کے دوسرے بیٹے شیر شاہ خان کو بھی حراست میں لے لیا گیا ہے۔ خاندانی ذرائع کے مطابق انہیں اپنی رہائشگاہ کے قریب سے گرفتار کیا گیا۔ کارروائی سادہ لباس اہلکاروں نے کی جبکہ اس دوران پولیس اہلکار بھی موجود تھے۔ ذرائع کا کہنا ہے کہ شیر شاہ خان کو نامعلوم مقام پر منتقل کر دیا گیا ہے،ایس ایس پی انویسٹی گیشن کا کہنا ہے کہ علیمہ خان کے بیٹے شیر شاہ 9 مئی کے کیسز میں حراست میں لیا گیا ہے ، معاملے کی تحقیقات کر رہے ہیں۔

دوسری جانب عدالت نے پولیس کی استدعا منظور کرتے ہوئے شاہ ریز کا 8 روزہ جسمانی ریمانڈ دے دیا۔ شاہ ریز عظیم کو لاہور کی انسداد دہشت گردی عدالت میں پیش کیا گیا جہاں ان کے کیس کی سماعت خصوصی عدالت کے جج منظر علی گل نے کی۔

(جاری ہے)

پولیس نے مؤقف اختیار کیا کہ ملزم کو 9 مئی کے جناح ہاؤس حملہ کیس میں ضمنی بیان میں نامزد کیا گیا، ملزم کو کل گرفتار کیا، جس سے فون اور دیگر چیزیں ابھی ریکور کرنی ہیں۔

ملزم کے وکیل سلمان اکرم راجہ نے سوال اٹھایا کہ 27 ماہ گزر گئے، پولیس کو اب ان کے ملوث ہونے کا پتہ چلا؟ ضمنی بیان ڈیڑھ ہزار مرتبہ عدالت میں پڑھا گیا کہیں یہ نام نہیں، کل بانی کی ضمانت ہوئی اور شام کو یہ ان کے بھانجوں کو گرفتار کرنے پہنچ گئے، بدنیتی واضح نظر آرہی ہے۔ انہوں نے مزید کہا کہ شاہ ریز عظیم عالمی لیول کے سپورٹس مین ہیں، کئی بار یہ ملک سے باہر گئے واپس آئے، کبھی کسی مقدمہ میں طلب نہیں کیا گیا، 6 سے 13 مئی تک یہ چترال میں تھے، انہیں فی الفور نہ صرف رہا کیا جائے بلکہ ڈسچارج کیا جائے۔ سلمان اکرم راجہ نے دلائل دیتے ہوئے کہا کہ آپ نے آرڈر دے رکھا ہے کہ اتنی دیر بعد جب آپ ملزمان کو نامزد کرتے ہیں تو اس میں بدنیتی نظر آتی ہے۔