تربت یونیورسٹی اور این سی ایچ ڈی کے درمیان تعلیم اور معاشی ترقی کے فروغ کے لئے مفاہمتی یادداشت پر دستخط

جمعہ 22 اگست 2025 17:59

کوئٹہ (اُردو پوائنٹ اخبارتازہ ترین - اے پی پی۔ 22 اگست2025ء) تربت یونیورسٹی اور نیشنل کمیشن برائے ہیومن ڈویلپمنٹ کے درمیان مفاہمتی یادداشت پر دستخط کئے گئے، جس کا مقصد تعلیم اور معاشی ترقی کے فروغ کے لئے مختلف اقدامات میں تعاون کو مضبوط بنانا ہے۔ ایم اویوپردستخط کرنے کی تقریب یونیورسٹی آف تربت کے وائس چانسلر سیکرٹریٹ میں منعقد ہوئی ،جس میں تربت یونیورسٹی کے رجسٹرار، گنگزار بلوچ اورنیشنل کمیشن برائے ہیومن ڈویلپمنٹ (این سی ایچ ڈی )کے ڈپٹی ڈائریکٹر محمد افضل نے مفاہمتی یادداشت پر دستخط کئے۔

مفاہمتی یادداشت کے تحت این سی ایچ ڈی، تربت یونیورسٹی کو خواندگی کے منصوبوں اور پروگراموں پر عملدرآمد کے لئے تکنیکی معاونت فراہم کرے گا۔ اس شراکت داری کا مقصد طلبہ کی مہارتوں اور صلاحیتوں میں اضافہ کرنے کے علاوہ ان کے لئے انٹرن شپس اور روزگار کے مواقع پیدا کرنا بھی ہے۔

(جاری ہے)

ایم او یو کے تحت دونوں ادارے تحقیقی مواد کے تبادلے، ورکشاپس اور کانفرنسزکےانعقاد، مشترکہ تحقیقی منصوبوں کے آغاز اور طلبہ، فیکلٹی اور عملے کو رضاکارانہ خدمات اور کمیونٹی سروسز میں حصہ لینے کی ترغیب دیں گے۔

ایم او یو کے مطابق تربت یونیورسٹی اور این سی ایچ ڈی تعلیم، سماجی بہتری اور معاشی ترقی کے پروگراموں کی منصوبہ بندی اور ان پر عملدرآمد کے لئے باہمی تعاون کریں گے جبکہ پاکستان میں انسانی ترقی کے اشاریوں کو بہتر بنانے پر بھی خصوصی توجہ دی جائے گی۔ان اقدامات میں “Each One Teach One” خواندگی مہم اور دیگر تعلیمی و سماجی ترقیاتی پروگرام شامل ہیں۔

یہ پروگرام وزیراعظم کے تعلیمی ایمرجنسی 2024 کا حصہ ہے۔تقریب میں یونیورسٹی کے ڈائریکٹر پبلک ریلیشنز اعجاز احمد، این سی ایچ ڈی کیچ کے اسسٹنٹ ڈائریکٹر لٹریسی عبدالسلام اور فیلڈ آفیسراعجاز احمد بھی موجود تھے۔یہ امر قابل ذکر ہے کہ 19 اگست کووائس چانسلر پروفیسرڈاکٹرگل حسن کی زیر صدارت منعقدہ تربت یونیورسٹی کی اکیڈمک کونسل کے 17ویں اجلاس میں وزیراعظم کے خواندگی پروگرام “Each One Teach One” پر عملدرآمد کی باضابطہ منظوری دی گئی تھی۔