کراچی میں بارش برسانے والا سسٹم کمزور پڑ گیا، اگلے اسپیل کی بھی پیشگوئی

فی الوقت، شہر میں موسلادھار بارشوں کا کوئی امکان نہیں ہے، ترجمان محکمہ موسمیات

جمعہ 22 اگست 2025 18:30

کراچی (اُردو پوائنٹ اخبارتازہ ترین - این این آئی۔ 22 اگست2025ء)شہر قائد میں بارشوں کا سبب بننے والا مون سون سلسلہ کمزور پڑ گیا ہے ۔تفصیلات کے مطابق مون سون سسٹم کے تحت منگل سے جمعرات کے درمیان کراچی میں 200 سے زائد ملی میٹر بارش ریکارڈ کی گئی۔

(جاری ہے)

موسلادھار بارش کے سبب کراچی میں منگل کو اربن فلڈنگ کی صورتحال پیدا ہوگئی جس سے مالی و جانی نقصان بھی ہوا جبکہ شہر کی اہم شاہراہیں اور انڈر پاسز بارش کے پانی سے بھر گئے۔

ترجمان محکمہ موسمیات کراچی انجم نذیر ضیغم کے مطابق کراچی میں حالیہ مون سون سسٹم کمزور پڑ گیا ہے تاہم بارش کا اگلا اسپیل 27 اگست سے متوقع ہے۔ فی الوقت، شہر میں موسلادھار بارشوں کا کوئی امکان نہیں ہے۔محکمہ موسمیات کی 21 اگست کو جاری کی گئی ایڈوائزری ملک کے بالائی علاقوں کے لیے ہے، جن میں بشمول کشمیر، پنجاب، خیبر پختون خوا، بلوچستان اور شمال مشرقی سندھ شامل ہے۔