Live Updates

مہنگی چینی کے بعد اب عوام کیلئے مہنگے آٹے کا تحفہ

یکدم آٹے کی قیمت میں 10 فیصد کا بڑا اضافہ ہو گیا، 20 کلو آٹے کے تھیلے کی قیمت میں نمایاں اضافہ ہو گیا

محمد علی جمعہ 22 اگست 2025 20:32

لاہور (اُردو پوائنٹ اخبارتازہ ترین۔ 22 اگست2025ء) مہنگی چینی کے بعد اب عوام کیلئے مہنگے آٹے کا تحفہ، یکدم آٹے کی قیمت میں 10 فیصد کا بڑا اضافہ ہو گیا، 20 کلو آٹے کے تھیلے کی قیمت میں نمایاں اضافہ ہو گیا۔ تفصیلات کے مطابق ایک ہفتے کے دوران آٹے کی قیمت میں بڑا اضافہ ہو گیا۔ میڈیا رپورٹس کے مطابق ادارہ شماریات نے انکشاف کیا ہے کہ ایک ہفتے کے دوران آٹے کے تھیلے کی قیمت میں بڑا اضافہ ہوا۔

10 کلو آٹے کے تھیلے کی قیمت میں 70روپے جبکہ 20 کلو آٹے کے تھیلے کی قیمت میں 140روپے تک اضافہ ہو گیا۔ ادارہ شماریات کی رپورٹ کے مطابق ایک ہفتے میں مہنگائی کی شرح میں 0.01 فیصد کی کمی ریکارڈ کی گئی، مہنگائی بڑھنے کی سالانہ شرح 2.30 فیصد ریکارڈ ہوئی۔ ادارہ شماریات نے ہفتہ وار بنیادوں پر مہنگائی کے اعداد و شمار جاری کر دیئے، ایک ہفتے میں 18 اشیاء کی قیمتوں میں اضافہ، 8 اشیاء کی قیمتوں میں کمی اور 25 اشیاء کی قیمتیں مستحکم رہیں۔

(جاری ہے)

رپورٹ کے مطابق ٹماٹر کی فی کلو قیمت میں 21 روپے تک اضافہ ہوا، پیاز کی فی کلو قیمت میں 7 روپے تک اضافہ ہوا ہے۔ ادارہ شماریات کے مطابق 20 کلو آٹے کا تھیلا 140 روپے تک مہنگا ہوا، لہسن کی فی کلو قیمت میں 11 روپے تک اضافہ ہوا۔ رپورٹ کے مطابق چینی کی فی کلو قیمت میں 2 روپے 15 پیسے بڑھی، ایل پی جی سلنڈر، چاول، دودھ بھی مہنگی ہونے والی اشیاء میں شامل ہیں۔