’’ایف آئی ڈی ایچ ، او ایم سی ٹی‘‘ کی مقبوضہ جموںوکشمیر میں کتابوں پر پابندی کی مذمت

ہفتہ 23 اگست 2025 17:20

اسلام آباد (اُردو پوائنٹ اخبارتازہ ترین - این این آئی۔ 23 اگست2025ء)انٹرنیشنل فیڈریشن فار ہیومن رائٹس (ایف آئی ڈی ایچ) اور ورلڈ آرگنائزیشن اگینسٹ ٹارچر (او ایم سی ٹی) نے بھارت کے غیر قانونی زیر قبضہ جموںوکشمیر میں انتظامیہ کی طر ف سے 25 علمی اور صحافتی کتابوں پر پابندی کی مذمت کی گئی ہے۔کشمیر میڈیاسروس کے مطابق’’ ایف آئی ڈی ایچ اور او ایم سی ٹی ‘‘ نے ایک مشترکہ بیان میں کہا کہ کتابیوں پر پابندی کا اقدام تعلیمی اور اظہار رائے کی آزادی کے حق کی خلاف ورزی ہے اور یہ معلومات تک رسائی پر قدغن کا واضح مظہر ہے۔

بیان میں کہا گیا کہ یہ پابندی تشویشناک ہے جو کشمیر میں بڑے پیمانے پر جبر کی نشاندہی کرتی ہے جہاں پہلے ہی انسانی حقوق کے محافظوں، صحافیوںاور سول سوسائٹی کی آوازوں کو نظر بندی ، مقدمات اور دھمکیوں کا سامنا ہے۔

(جاری ہے)

بیان میں کہا گیا کہ جموںوکشمیر میں اختلاف رائے کی آوازوں کو خاموش کرانے کیلئے آرمڈ فورسز سپیشل پاورز ایکٹ ، غیر قانونی سرگرمیوں کی روک تھام کے قانون ’’یو اے پی اے ‘‘ اور پبلک سیفٹی ایکٹ جیسے کالے قوانین کا استعمال مسلسل جاری ہے ، یہ قوانین انسانی حقوق کے عالمی معیارات کے منافی ہیں لہذا حقوق کے اداروں کی طرف سے انکی بارہا مذمت کی گئی ہے۔

بیان میں کہا گیا کہ کشمیر میں سنسر شپ اور نگرانی کا ماحول پہلے ہی انسانی حقوق کے محافظوں کے لیے سنگین نتائج کا باعث بن چکا ہے۔ انسانی حقوق کے ممتاز کشمیری کارکن خرم پرویز، صحافی عرفان معراج یو اے پی کے تحت نظر بند ہیں۔’ ایف آئی ڈی ایچ اور او ایم سی ٹی ‘‘ نے مشترکہ بیان میں کہا کہ کتب پر پابندی دراصل دستاویزات کو دبانے اور کشمیر میں انسانی حقوق کی خلاف ورزیوں کی عوامی جانچ کو روکنے کی وسیع حکمت عملی کا حصہ ہے۔ بیان میں بھارتی حکام سے مطالبہ کیا گیا کہ وہ اظہار رائے کی آزادی کے حق اور ان لوگوں کے تحفظ کو یقینی بنائیں جو سنگین خطرات کے باوجودکشمیرمیں انسانی حقوق پر بات کرتے اور لکھتے رہتے ہیں۔