Live Updates

ڈپٹی کمشنر حیدرآباد کی زیر صدارت جشن میلاد النبی ﷺ 1500ویں سالانہ تقاریب کے انتظامات کے حوالے سے اجلاس

ضلعی انتظامیہ کی جانب سے 10ربیع الاول کو ایک عظیم الشان علما کانفرنس اور میلادالنبی ﷺ کی تقریب منعقد کی جائے گی

ہفتہ 23 اگست 2025 21:40

حیدرآباد(اُردو پوائنٹ اخبارتازہ ترین - این این آئی۔ 23 اگست2025ء)ڈپٹی کمشنر حیدرآباد زین العابدین میمن کی زیر صدارت شہباز بلڈنگ میں جشن میلاد النبی ﷺ 1500ویں سالانہ تقاریب کے انتظامات کے حوالے سے ایک اہم اجلاس ہوا، جس میں مختلف مکاتب فکر کے علما کرام، تاجر برادری اور متعلقہ سرکاری افسران نے شرکت کی۔اجلاس میں میلاد النبی ﷺ کی مجالس، جلوسوں کے راستے اور سیکیورٹی پلان پر تفصیلی بات چیت ہوئی۔

ڈپٹی کمشنر زین العابدین نے کہا کہ جلوسوں کے روٹس اور مساجد کے اطراف صفائی، نکاسی آب، قبرستانوں کی دیکھ بھال، اسٹریٹ لائٹس کی مرمت، کھلے مین ہولز کی بندش، فومیگیشن اور مچھر مار اسپرے سمیت تمام ضروری اقدامات بروقت مکمل کیے جائیں۔ انہوں نے متعلقہ محکموں کو ہدایت کی کہ شہر میں پینے کے پانی، بجلی اور گیس کی بلاتعطل فراہمی یقینی بنائی جائے جبکہ اسپتال چوبیس گھنٹے کھلے رہیں، ادویہ و ایمبولینسز دستیاب ہوں اور فائر بریگیڈ کی تعیناتی بھی کی جائے، ڈی سی نے کہا کہ ہماری ترجیح ہے کہ جلوسوں کے روٹس، مدارس اور جامعہ مساجد کو صاف ستھرا اور محفوظ بنایا جائے۔

(جاری ہے)

پولیس اور رینجرز کے ساتھ سیکیورٹی کے بہترین انتظامات کئے جائیں گے، بارہ ربیع الاول پر شہر کو روشنیوں سے سجایا جائے گا، انہوں نے کہا کہ بارش کے پانی کی نکاسی اور کچرے کے ڈھیر ختم کرنے کے لیے ٹیمیں ہمہ وقت متحرک رہیں گی، انہوں نے کہا کہ بارش کے باعث سڑکوں پر کھڈے پڑ گئے ہیں جنہیں دستیاب وسائل میں رہتے ہوئے پیچ ورک کے ذریعے بہتر بنانے کی کوشش کی جائے گی، ڈی سی زین العابدین میمن نے اعلان کیا کہ ضلعی انتظامیہ کی جانب سے 10ربیع الاول کو ایک عظیم الشان علما کانفرنس اور میلادالنبی ﷺ کی تقریب منعقد کی جائے گی۔