بیٹی کی ذمے داریاں نبھانے میں کیارا کا سپورٹنگ ایکٹر ہوں، سدھارتھ ملہوترا

بالی وڈ اداکار سدھارتھ ملہوترا اور کیارا اڈوانی اس سال 15 جولائی کو بیٹی کے والدین بنے ہیں

جمعہ 29 اگست 2025 12:05

ممبئی (اُردو پوائنٹ اخبارتازہ ترین - این این آئی۔ 29 اگست2025ء)بالی ووڈ اداکار سدھارتھ ملہوترا نے بطور والد ذمے داریوں پر کھل کر بات کرتے ہوئے خود کو اپنی اہلیہ کیارا اڈوانی کا سپورٹنگ ایکٹر (معاون اداکار)قرار دیا ہے۔بھارتی میڈیا کے مطابق سدھارتھ ملہوترا نے دی گریٹ انڈین کپل شو میں اپنی بیٹی کے بارے میں بات کی اور اس بارے میں بتایا ہے کہ اس نے ان کی اور کیارا اڈوانی کی زندگیوں کو کیسے بدل دیا ہے۔

بالی وڈ اداکار سدھارتھ ملہوترا اور کیارا اڈوانی اس سال 15 جولائی کو بیٹی کے والدین بنے ہیں۔کپل شرما کے نیٹ فلکس پر شو میں سدھارتھ نے کہا کہ ہمارا شیڈول مکمل طور پر بدل گیا ہے، میں ابھی صبح صبح وہیں سے آیا ہوں، چاہے بیٹی کے کھانے پینے کا خیال رکھنا ہو یا اس کے سونے کا معمول ہو، آج کل ہم راتوں کو دیر تک بیٹی کی وجہ سے جاگ رہے ہیں اسے رات کو 3، 4 بجے فیڈنگ کرائی جاتی ہے۔

(جاری ہے)

سدھارتھ نے کہا کہ میں تو بطور سپورٹنگ ایکٹر کردار ادا کر رہا ہوں، جو صرف وہاں پر کھڑے ہو کر یہ سب دیکھ رہا ہوتا ہے، اصل ذمے داری کیارا نبھا رہی ہوتی ہیں۔جب ارچنا پورن سنگھ نے ان سے ڈائپر بدلنے کی ذمے داریاں نبھانے سے متعلق سوال کیا تو سدھارتھ نے اس بات کا اقرار کیا۔سدھارتھ، جھانوی کپور، سنجے کپور، منجوت سنگھ اور عنایت ورما کے ساتھ تشار جلوٹا کی ہدایت کاری میں اپنی آنے والی فلم پرم سندری کی تشہیر کے لیے کپل شرما کے شو میں آئے تھے۔فلم کل بھارت بھر کے سنیما گھروں کی زینت بن رہی ہے۔کیارا حال ہی میں ایان مکھرجی کی فلم وار 2 میں جلوے بکھیرتی نظر آئی تھیں، جس میں ریتک روشن اور جونیئر این ٹی آر ان کے ساتھی اداکار ہیں۔