بھارت جبر و استبداد کے ہتھکنڈوں سے کشمیریوں کے حوصلے ہرگز پست نہیں کرسکتا، تحریک حریت

ہفتہ 30 اگست 2025 13:05

سرینگر (اُردو پوائنٹ اخبارتازہ ترین - اے پی پی۔ 30 اگست2025ء) بھارت کے غیر قانونی زیر تسلط جموں و کشمیر میں ”تحریک حریت “نے کہا ہے کہ بھارت قتل و غارت، غیر قانونی نظر بندیوں اور جبر و استبداد کے دیگر ہتھکنڈوں سے کشمیریوں کے جذبہ آزادی کو ہرگز دبا نہیں سکتا ، اسے طاقت کی پالیسی ترک کرکے مسئلہ کشمیر کے حل کےلئے ماحول کو سازگار بنانا چاہیے۔

کشمیر میڈیا سروس کے مطابق تحریک حریت جموں وکشمیر کے ترجمان احمد یاسین نے سرینگر میں جاری ایک بیان میں کہا کہ مسائل و تنازعات کو جنگ و جدل اورظلم و ستم کے ذریعے حل نہیں کیا جاسکتا لہذا بھارت کو چاہیے کہ وہ امن و انصاف کا راستہ اختیار کرے اور کشمیریوں کو ان کا پیدائشی حق ، حق خود اردیت دے۔انہوں نے کہا کہ کسی قوم کے نوجوانوں اور سیاسی قیادت کو قید کر کے اور اذیتیں دے کر ان کے حوصلے توڑے نہیں جا سکتے ، بھارت سید علی گیلانی ، محمداشرف صحرائی کو برسہا برس تک قید میں رکھ کر ان کے حوصلے نہیں توڑ سکا ،وہ مسرت عالم بٹ، شبیر احمد شاہ، یاسین ملک ، آسیہ اندرابی ،امیر حمزہ، پیر سیف اللہ، ایاز اکبر، معراج الدین کلوال، ڈاکٹر قاسم فکتواور دیگر اسیر قائدین کو بھی ہرگز جھکنے پر مجبور نہیں کر سکتا ۔

(جاری ہے)

تحریک حریت کے ترجمان نے نظر بند کشمیریوں کے تئیں ظالمانہ بھارتی رویے کی شدید مذمت کرتے ہوئے انسانی حقوق کے عالمی اداروں پر زور دیا کہ وہ اس کا نوٹس لیں۔