سید علی گیلانی صرف ایک رہنما نہیں تھے بلکہ وہ اپنی ذات میں انجمن تھے،ملک محمد اسحاق

سید علی گیلانی کی ثابت قدمی اور صبر واستقامت کی وجہ سے کشمیری عوام کے دلوں میں انکی بے حد قد و منزلت پائی جاتی ہے

اتوار 31 اگست 2025 14:40

دبئی(اُردو پوائنٹ اخبارتازہ ترین - این این آئی۔ 31 اگست2025ء)صدر پاکستان پیپلزپارٹی (پالیسیز ومنصوبہ بندی) خلیج ومشرق وسطیٰ ملک محمد اسحاق نے بزرگ حریت قائد سید علی گیلانی کو ان کی چوتھی برسی کے موقع پر شاندار خراج عقیدت پیش کرتے ہوئے انہیں مزاحمت کی ایک عظیم علامت قرار دیا ہیانھوں نے کہا سید علی گیلانی صرف ایک رہنما نہیں تھے بلکہ وہ اپنی ذات میں انجمن تھے جن کی زندگی بھر کی جدوجہد اور قربانیاں آزادی پسند کشمیریوں کی رہنمائی کرتی رہیں گی۔

انہوں نے سید علی گیلانی کو جرات اور صبرو استقامت کی ایک عظیم علامت قرار دیا جنہوں نے اپنی پوری زندگی جموں وکشمیر کی بھارتی غلامی سے آزادی کیلئے وقف کر دی تھی۔انھوں نے کہا کہ سید علی گیلانی کشمیر کے تنازعہ پر ایک غیر متزلزل موقف رکھتے تھے۔

(جاری ہے)

انھوں نے مزید کہا کہ سید علی گیلانی کی ثابت قدمی اور صبر واستقامت کی وجہ سے کشمیری عوام کے دلوں میں انکی بے حد قد و منزلت پائی جاتی ہے۔

انہوں نے کہا کہ طویل قید، گھر میں نظر بندی، ذہنی اذیت اور بھارتی ایجنسیوں کی جانب سے بار بار قتل کی کوششوں کے باوجود وہ بھارت کے وحشیانہ قبضے کے خلاف چٹان کی طرح کھڑے رہے، ان کا جذبہ مزاحمت ناقابل تسخیر تھا اور بھارت کشمیریوں کی اپنے اس محبوب قائد سے محبت کو کبھی نہیں مٹا سکتا ان کا کہنا تھا کہ سید علی گیلانی کا مشہور نعرہ ’’ہم پاکستانی ہیں، پاکستان ہمارا ہے‘‘ آج بھی 10 لاکھ سے زائد بھارتی فوج کی موجودگی میں مقبوضہ جموں وکشمیر کے ہر کونے میں گونجتا ہے۔

انہوں نے کہا کہ سید علی گیلانی زندگی بھر کشمیر کے پاکستان کے ساتھ الحاق کے کٹر حامی رہے اور انہوں نے حق خود ارادیت پر کبھی سمجھوتہ نہیں کیا۔انہوں نے کہا کہ ستمبر 2021 میں سید علی گیلانی کی دوران حراست شہادت کشمیر کی تاریخ کے المناک واقعات میں سے ایک ہے۔ بھارتی فورسز نے انکی میت طاقت کے بل پر قبضے میں لی اور اپنے پیاروں کی عدم موجودگی میں رات کی تاریکی میں سپرد خاک کی۔