پاکستان نے امریکا کیلئے ڈاک اور پارسل کی ترسیل معطل کر دی

مختلف ممالک نے اقوام متحدہ کے ادارے یونیورسل پوسٹل یونین کے ذریعے امریکا کے ساتھ اٹھایا ہے

میاں محمد ندیم پیر 1 ستمبر 2025 15:19

پاکستان نے امریکا کیلئے ڈاک اور پارسل کی ترسیل معطل کر دی

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔یکم ستمبر ۔2025 )امریکا کی جانب سے ٹیرف میں اضافے کے بعد پاکستان بھی عارضی طور پر امریکا کو ڈاک اور پارسل کی ترسیل معطل کر نےوالے 25ممالک کی فہرست میں شامل ہوگیا ہے رپورٹ کے مطابق موجودہ صورتحال کے باعث پاکستان پوسٹ نے بھی امریکا کےلئے بک کی گئی ڈاک بھیجنا بند کر دی ہے کیونکہ خدشہ ہے کہ نئی امریکی پالیسی کے تحت یہ ڈاک واپس کر دی جائے گی.

(جاری ہے)

امریکی حکومت نے 25 جولائی کو ایگزیکٹو آرڈر نمبر 14324 کے تحت سابقہ ڈیوٹی فری سہولت معطل کر دی تھی امریکا کے اس اقدام سے دنیا بھر میں امریکا کے لیے ڈاک کا نظام بری طرح متاثر ہوا ہے کیوں کہ اب ہر قسم کی ڈاک پر نئے نظام کے تحت ٹیکس اور ڈیوٹی دینا لازمی ہوگا دنیا کے بڑے ممالک چین، برطانیہ، جاپان، آسٹریا، آسٹریلیا، نیوزی لینڈ، بھارت، جرمنی، فرانس، روس اور سنگاپور نے بھی عارضی طور پر امریکا کو ڈاک بھیجنا بند کر دی ہے کیوں کہ ایئرلائنز نے بھی ڈاک پہنچانے سے معذرت کر لی ہے. امریکی اقدام سے متاثرہ ممالک نے اس معاملے کو اقوام متحدہ کے ادارے یونیورسل پوسٹل یونین کے ذریعے امریکا کے ساتھ اٹھایا ہے اور یہ ادارہ اس تنازع کو حل کرنے کے لئے اقدامات کر رہا ہے یاد رہے کہ 26 اگست کو غیر ملکی نشریاتی ادارے کی رپورٹ میں کہا گیا تھا کہ 25 ممالک نے امریکا کو پارسل بھیجنے کی خدمات معطل کرنے کا فیصلہ کر لیا ہے کیوں کہ صدر ڈونلڈ ٹرمپ کے مجوزہ محصولات کے اثرات پر خدشات بڑھ گئے تھے ٹرمپ انتظامیہ نے گزشتہ ماہ کے آخر میں کہا تھا کہ وہ 29 اگست سے امریکا میں داخل ہونے والے چھوٹے پارسلز پر ٹیکس چھوٹ ختم ہو جائے گی.