Live Updates

مریم نوازسیلاب متاثرین کے بڑے ریلیف پیکیج کا جلد اعلان کریں گی‘ عظمی بخاری

اینٹی کرپشن نے دریا ،ندی نالوں کی آبی گزرگاہوں میں قائم ہائوسنگ سوسائٹیز کے مالکان کے حوالے سے کارروائیاں شروع کردی سیلاب کے دوران اور بند توڑنے کے حوالے سے مریم نواز نے کسی قسم کی کوئی مداخلت نہیں کی‘ صوبائی وزیر اطلاعات و ثقافت کی گفتگو

بدھ 3 ستمبر 2025 21:30

لاہور(اُردو پوائنٹ اخبارتازہ ترین - این این آئی۔ 03 ستمبر2025ء)وزیراطلاعات پنجاب عظمی بخاری نے کہا ہے کہ مریم نواز سیلاب متاثرین کے بڑے ریلیف پیکیج کا جلد اعلان کریں گی۔سیلاب متاثرہ بہت بڑا ریسکیوآپریشن کیا گیا ہے، تمام ادارے دن رات کام کر رہے ہیں، گزشتہ کئی سالوں سے کبھی ایسا نہیں ہوا کہ مون سون کا چار ماہ کا سپیل آیا۔نجی ٹی وی سے گفتگو کرتے ہوئے انہوں نے کہا کہ ریلیف کیمپ بند کرنے کے حوالے سے سوشل میڈیا پر جھوٹی خبریں چلائی جارہی ہیں، بچوں کی تعلیمی سرگرمیاں جاری رکھنے کیلئے ریلیف کیمپوں میں ہی سکولز قائم کیے گئے ہیں، وزیراعلی پنجاب سیلاب متاثرین کے بڑے ریلیف پیکیج کا جلد اعلان کریں گی۔

وزیراطلاعات پنجاب نے مریم نواز کے دوروں کے حوالے سے سوال کے جواب میں کہا کہ وزیراعلی کے دوروں کے دوران ایک طرف انتظامیہ پرچیک اینڈ بیلنس رہتا ہے اور دوسری جانب وہ کھانا ،ادویات، جانوروں کے چارے اور ریسکیو سے متعلق ضلع کے کمشنر اور ڈپٹی کمشنرز سے روزانہ کی بنیاد پر رپورٹس لیتی ہیں۔

(جاری ہے)

عظمی بخاری نے وزیراعلی کی تصویر کے حوالے سے ایس او پیز کے بارے میں بتایا کہ مریم نواز کی تصویر سے بہت سے مخالفین کو تشویش اور انہیں ڈر لگتا ہے، کیونکہ انہوں نے اپنی محنت سے بہت سے لوگوں کی محبت سمیٹ لی ہے ۔

وزیراطلاعات پنجاب نے کہا کہ فوڈ سکیورٹی کے ممکنہ بحران کے حوالے سے وزیراعلی پنجاب نے کل تین گھنٹے اجلاس کیا جس کیلئے پنجاب حکومت اقدامات کررہی ہے کہ اشیا ئے خورونوش کی قیمتوں میں اضافہ نہ ہوا۔عظمی بخاری نے کہا کہ اینٹی کرپشن نے دریا اور ندی نالوں کی آبی گزرگاہوں میں قائم ہائوسنگ سوسائٹیز کے مالکان کے حوالے سے کارروائیاں شروع کردی گئیں ہیں، آج ایک ہائوسنگ سوسائٹی کا مالک بھی گرفتار کیا گیا، باقی کی بھی تفصیلات منگوا لی ہیں۔

انہوں نے کہا کہ سیلاب کے دوران اور بند توڑنے کے حوالے سے مریم نواز نے کسی قسم کی کوئی مداخلت نہیں کی، انہوں نے اس حوالے سے کوئی سیاسی دبا ئوقبول نہیں کیا۔عظمی بخاری نے علی امین گنڈا پور کے کالا باغ ڈیم کے حوالے سے بیان ے متعلق کہا کہ مریم نواز بھی اس حوالے سے سنجیدہ ہیں، ان کی پالیسی ہے وہ تمام لوگوں کو ساتھ لے کر چلتی ہیں اور آنے والے دنوں ایسی آفات سے نمٹنے کے لیے اتفاق رائے سے فیصلے کریں گی۔