Live Updates

پنجاب سے ابھی سیلاب کا خطرہ پوری طرح سے ختم نہیں ہوا

تینوں دریاؤں میں ابھی بھی طغیانی ہے، چناب میں ریلے کے زور کو کم کرنے کیلئے ملٹی شگاف ڈالے، گزشتہ رات ہیڈمرالہ کے مقام پر 6لاکھ کیوسک کا ریلہ گزرا۔ ڈائریکٹر جنرل پی ڈی ایم اے پنجاب

ثنااللہ ناگرہ جمعرات 4 ستمبر 2025 00:04

پنجاب سے ابھی سیلاب کا خطرہ پوری طرح سے ختم نہیں ہوا

لاہور ( اردوپوائنٹ اخبار تازہ ترین۔ آئی پی اے ۔03ستمبر 2025ء ) ڈائریکٹر جنرل پی ڈی ایم اے پنجاب نے کہا ہے کہ پنجاب سے ابھی سیلاب کا خطرہ پوری طرح سے ختم نہیں ہوا،تینوں دریاؤں میں ابھی بھی طغیانی ہے۔ انہوں نے اے آروائی نیوز کے پروگرام میں گفتگو کرتے ہوئے کہا کہ پنجاب سے سیلاب کا خطرہ ٹل گیا یہ کہنا ٹھیک نہیں،پنجاب سے ابھی سیلاب کا خطرہ پوری طرح سے ختم نہیں ہوا، تینوں دریاؤں میں ابھی بھی طغیانی ہے، اگلے 72 گھنٹے اہم ہیں، چناب میں مزید پانی آیا اور ابھی دریائے راوی کے پانی نے بھی ملنا ہے، چناب میں ریلے کے زور کو کم کرنے کیلئے ملٹی پل بریچ ڈالے۔

گزشتہ رات ہیڈمرالہ کے مقام پر 6لاکھ کیوسک کا ریلہ گزرا۔ہیڈ مہمند والا ملتان میں بھی سیلابی ریلہ ہے۔ مزید برآں ڈائریکٹر جنرل پی ڈی ایم اے سندھ سلمان شاہ نے اے آروائی نیوز کے پروگرام میں گفتگو کرتے ہوئے کہا کہ سندھ میں بند مضبوط اور اونچے ہیں، 12لاکھ کیوسک ریلے کو بھی برداشت کرسکتے ہیں، سندھ سے 12لاکھ کیوسک پانی کا ریلہ آسانی سے گزر سکتا ہے، سیلاب کی شدت سندھ میں پنجاب سے کم ہوگی، سکھر سے کوٹری تک دریا چوڑا ہے اس لئے اثر کم دکھائی دیتا ہے۔

(جاری ہے)

کچے کا علاقہ 7لاکھ کیوسک ریلے میں پورا ڈوب جاتا ہے، سندھ میں اتنا پانی ضرور آئے گا کہ پورے کچے کو ڈبو دے گا۔ امید ہے کہ ریلوں کی شدت میں کمی سے صورتحال بہتر رہے گی۔سیلابی ریلوں کی شدت میں کچھ کمی آئی ہے۔ سندھ حکومت نے سپر فلڈ سے نمٹنے کی تیاریاں کررکھی ہے۔ گدو بیراج پر 6سے 7لاکھ کیوسک کا ریلہ آسکتا ہے۔ دوسری جانب سپرنٹندٹنگ انجینئر ایریگیشن نصیرآبادغلام سرور بنگلزئی نے کہا کہ اس وقت دریائے سندھ میں گڈو کے مقام پر تین لاکھ 70 ہزار کیوسک جبکہ سکھر بیراج سے تین لاکھ کیوسک کا سیلابی ریلا گزر رہا ہے۔ اس حوالے سے سندھ حکومت سے باہمی مشاورت اور روابط میں ہیں سیلابی صورتحال کے حوالے سے عملی طور پر اقدامات کیے گئے ہیں۔