Live Updates

"میرے گھر میں مجھے سارے گُڑیا کہہ کر بلاتے ہیں، میں بھی گُڑیا ہوں"

وزیر اعلٰی پنجاب مریم نواز کا ملتان میں قاسم بیلہ ریلیف کیمپ کا دورہ، بچوں میں تحائف تقسیم کیے

محمد علی بدھ 3 ستمبر 2025 23:48

"میرے گھر میں مجھے سارے گُڑیا کہہ کر بلاتے ہیں، میں بھی گُڑیا ہوں"

ملتان (اُردو پوائنٹ اخبارتازہ ترین۔ 03 ستمبر2025ء) مریم نواز نے ملتان میں سیلاب سے متاثرہ بچوں سے گفتگو کرتے ہوئے کہا کہ "میرے گھر میں مجھے سارے گُڑیا کہہ کر بلاتے ہیں، میں بھی گُڑیا ہوں" ۔ تفصیلات کے مطابق وزیراعلیٰ پنجاب مریم نواز شریف نے پنجاب کے ضلع ملتان کا دورہ کیا ، قاسم بیلہ ریلیف کیمپ میں انتظامات کا جائزہ لیا۔اپنے دورے کے دوران مریم نواز سیلاب متاثرہ بچوں اور خواتین میں گھل مل گئیں، انہوں نے بچوں میں چاکلیٹ، بسکٹ اور وردی پیک تقسیم کیے ، بچوں کو خود اپنے ہاتھوں سے جوتے پہنائیں، خواتین کو ملبوسات اوردیگر تحائف پیش کیے۔

وزیراعلیٰ پنجاب فلڈ کیمپ میں ننھے بچوں کے درمیان بیٹھ گئیں جبکہ بچوں سے گپ شپ کی اور مختلف سوال پوچھے،انہوں نے بچوں سے حروف تہجی کے بارے میں پوچھا۔

(جاری ہے)

بچوں سے گفتگو کے دوران ایک بچی کی جانب سے اپنا نام گڑیا بتانے پر مریم نواز نے کہا کہ "میرے گھر میں مجھے سارے گُڑیا کہہ کر بلاتے ہیں، میں بھی گُڑیا ہوں"۔ بچوں سے گھل مل جانے کے بعد مریم نواز نے متاثرہ خاندانوں سے مسائل اور ضروریات کے بارے میں دریافت کیا۔

خواتین کو گھروں کی بحالی کے لیے اقدامات کا یقین دلایا اور ٹینٹوں میں صفائی اور دیگر انتظامات پر اظہار اطمینان کیا، قاسم بیلہ فلڈ ریلیف کیمپ میں ہیلتھ، ریسکیو اور دیگر کاؤنٹرز کا جائزہ لیا۔کمشنر ملتان عامر کریم اور ڈپٹی کمشنر وسیم سندھو نے وزیراعلیٰ پنجاب کو انتظامات کے بارے میں بتایا کہ وزیراعلیٰ مریم نواز نے بچوں کیلئے کھانا، دودھ اور دیگر ضروریات پوری کرنے کی ہدایت کی، انہیں مظفر گڑھ کے علاقے ہیڈ محمد والا میں سیلابی صورتحال پر بھی بریفنگ بھی دی گئی۔