19 سال بعد پشاور میں شاندار کرکٹ ایونٹ، عوام کی بھرپور شرکت، صوبائی وزیر کھیل نے شہریوں اور میڈیا کا شکریہ ادا کیا

پشاور(اُردو پوائنٹ اخبارتازہ ترین - آن لائن۔ 04 ستمبر2025ء)خیبرپختونخوا کے وزیر کھیل و امور نوجوانان سید فخرجہان نے کہا ہے کہ 19 سال بعد پشاور کے عوام کو کھیل کے میدان میں ایک شاندار موقع میسر آیا ہے جو نہ صرف صوبے بلکہ ملک کے لیے خوش آئند ہے۔وزیر کھیل نے کہا کہ بانی چئرمین عمران خان کے عوام دوست ویژن کے مطابق صوبائی حکومت کھیلوں کی ترویج اور نوجوانوں کو صحت مند سرگرمیوں میں شامل کرنے کے لیے آئندہ بھی ایسے ایونٹس کا باقاعدگی سے انعقاد کرائے گی۔

ان کا کہنا تھا کہ کھیلوں کی سرگرمیاں نوجوان نسل کو مثبت سمت دینے میں کلیدی کردار ادا کرتی ہیں اور ان کیلئے مثبت سرگرمیوں کے انعقاد کا تسلسل جاری رہے گا۔صوبائی وزیر نے مزید کہا کہ اسی ہفتے عمران خان کرکٹ سٹیڈیم میں فلڈ لائٹس انسٹال کر دی جائیں گی جس سے یہاں عالمی معیار کے میچز اور تقریبات کے انعقاد میں مزید سہولت پیدا ہوگی۔

(جاری ہے)

ان خیالات کا اظہار انھوں نے جمعرات کے روز پشاور سپورٹس کمپلیکس میں میڈیا کے نمائندوں سے بات چیت کے دوران کیا۔

صوبائی وزیر نے کہا کہ عنقریب پشاور زلمی کا دوسرا میچ عمران خان کرکٹ سٹیڈیم کے گراؤنڈ میں کھیلا جائے گا جس میں عوام کی شمولیت کو یقینی بنانے کے لیے انٹری بالکل فری رکھی جائے گی۔سید فخر جہان نے کہا کہ چیرٹی میچ کے دوران پاکستان سپر لیگ (PSL) کے چیف ایگزیکٹو آفیسر سلمان نصیر سے خوشگوار ملاقات بھی ہوئی اور انشاء اللہ آئندہ پی ایس ایل کے میچز بھی پشاور کے اس گراؤنڈ میں شیڈول کیے جائیں گے۔

انھوں نے کہا کہ سیلاب زدگان کیلئے منعقدہ چیرٹی میچ سے ایک طرف سیلاب زدگان سے یکجہتی کا پیغام گیا تو دوسری جانب شہریوں کو 19 سال بعد پشاور میں کھیل کا ایک اچھا موقع ملا جس سے عوام، فیملیز اور خواتین نے بھرپور لطف اٹھایا۔ سید فخرجہان نے کرکٹ کے لیجنڈز اور موجودہ کھلاڑیوں کا بھی شکریہ ادا کیا کہ انہوں نے اس میچ میں حصہ لے کر ایونٹ کو کامیاب بنایا۔

صوبائی وزیر نے بتایا کہ اس میچ سے ٹکٹوں کی مد میں پونے دو کروڑ روپے جمع ہوئے جو صوبائی ڈیزاسٹر مینجمنٹ اتھارٹی (PDMA) خیبرپختونخوا کے اکاؤنٹ میں جمع کرا دیے گئے ہیں تاکہ سیلاب متاثرین کی بحالی کے لیے استعمال ہوں۔آخر میں سید فخرجہان نے پشاور کی میڈیا کمیونٹی کا شکریہ ادا کیا جنہوں نے اس ایونٹ کو کامیاب بنانے میں اہم کردار ادا کیا۔ ان کا کہنا تھا کہ میڈیا کی مثبت کوریج کھیل کے فروغ میں سنگِ میل کی حیثیت رکھتی ہے۔واضح رہے کہ حالیہ چیریٹی میچ "کھیل سے خدمت" کے عنوان سے ڈائریکٹوریٹ جنرل آف اسپورٹس خیبرپختونخوا کے زیر اہتمام عمران خان کرکٹ گراؤنڈ پشاور میں پشاور زلمی اور لیجنڈز الیون کے درمیان کھیلا گیا