Live Updates

پولٹری فارمنگ ملک کی دوسری بڑی صنعت،اس سے لاکھوں افراد کا روزگار وابستہ ہے، ڈاکٹر قیصر خلیق

جمعہ 5 ستمبر 2025 13:30

لاہور (اُردو پوائنٹ اخبارتازہ ترین - اے پی پی۔ 05 ستمبر2025ء) ایڈیشنل ڈائریکٹرمحکمہ لائیوسٹاک و ڈیری ڈویلپمنٹ فیصل آباد ڈاکٹرقیصر خلیق نے کہا ہے کہ پاکستان میں پولٹری فارمنگ ٹیکسٹائل کے بعد دوسری بڑی صنعت کا درجہ اختیار کر گئی ہے جس سے لاکھوں افراد کا روزگار وابستہ ہے۔ یہ بات انہوں نے اے پی پی سے بات چیت کے دوران کہی۔انہوں نے کہا کہ اگرچہ مرغبانی کی صنعت تیزی سے فروغ پا رہی ہے لیکن اس ضمن میں ضروری اقدامات کو مد نظر نہیں رکھا جا رہا جس سے مرغی خانوں میں بیماریاں پھیلنے کے خدشات موجود رہتے ہیں۔

ا ن کا کہنا تھا کہ یو ں تو بہت سی صنعتوں میں قابل ذکر ترقی ہوئی ہے لیکن جو ترقی مرغبانی کے میدان میں ہوئی وہ اپنی مثال آپ ہے۔ انہوں نے کہاکہ اس صنعت سے وابستہ سٹیک ہولڈرز، سائنسدانوں،ماہرین لائیوسٹاک اور تاجروں نے بڑی لگن اور شب و روز کی محنت سے اسے بام عروج تک پہنچایا ۔

(جاری ہے)

ڈاکٹر قیصر خلیق نے کہا کہ موجودہ دور میں ماحول کنٹرول سسٹم اشد ضروری ہے اس لئے اگر برائلر فارم لگانامقصود ہوتو کم از کم 25ہزار کی گنجائش کا شیڈ ہونا اور اگر انڈے والی مرغی رکھنا ہو تو کم ازکم 30ہزار لیئر مرغی کارکھنا اشد ضروری ہے تاکہ پولٹری فارم سے پورا پورا فائدہ اٹھایا جا سکے۔

انہوں نے کہا کہ جس جگہ پولٹری فارم لگانا مطلوب ہو اس جگہ کے پانی کا پہلے لیبارٹری ٹیسٹ کروانا ضروری ہے تاکہ اس بات کا علم ہو سکے کہ یہ پانی مرغیوں کےلئے مفید ہے یا نہیں۔ انہوں نے کہاکہ ایسی جگہ فارم لگانے سے گریز کرنا چاہیے کہ جہاں بارش کا پانی کھڑا رہنے، سیلاب آنے یا بجلی کی سپلائی میں رکاوٹ کا خطرہ ہو۔ انہوں نے کہا کہ اگر مجوزہ پولٹری فارم کے ساتھ چاول کی فصل کاشت کی جاتی ہو تو ایسی زمین کے ساتھ بھی پولٹری فارم لگانے سے گریز کرنا چاہیے۔\932