ڈیرہ مراد جمالی ،پاکستان کی سرحدوں کی حفاظت پر مامور ہماری بہادر افواج قوم کا فخر ہیں،چیئرمین میونسپل کمیٹی

جمعہ 5 ستمبر 2025 14:00

ڈیرہ مراد جمالی (اُردو پوائنٹ اخبارتازہ ترین - اے پی پی۔ 05 ستمبر2025ء) چھ ستمبر یومِ دفاعِ پاکستان کے موقع پر چیئرمین میونسپل کمیٹی ڈیرہ مراد جمالی میر صفدر خان عمرانی نے اپنے خصوصی پیغام میں پاک فوج کو خراجِ تحسین پیش کرتے ہوئے کہا ہے کہ پاکستان کی سرحدوں کی حفاظت پر مامور ہماری بہادر افواج قوم کا فخر ہیں۔ انہوں نے کہا کہ 6 ستمبر کا دن ہمیں 1965ء کی اس جنگ کی یاد دلاتا ہے جب پاک فوج نے دشمن کی جارحیت کو جرات و بہادری سے ناکام بنایا اور پوری قوم سیسہ پلائی دیوار بن کر اپنے سپاہیوں کے شانہ بشانہ کھڑی ہوئی۔

میر صفدر خان عمرانی نے کہا کہ ہماری مسلح افواج نہ صرف سرحدوں کی حفاظت کر رہی ہیں بلکہ اندرونی محاذ پر بھی دہشت گردی کے خلاف جنگ میں بے مثال قربانیاں دے رہی ہیں ان کی شجاعت، حب الوطنی، اور پیشہ ورانہ مہارت دنیا بھر میں قابلِ تقلید ہےانہوں نے مزید کہا کہ یومِ دفاع صرف ایک دن نہیں بلکہ یہ ایک یاد دہانی ہے کہ وطن کی حفاظت ہرپاکستانی کی ذمہ داری ہے۔

(جاری ہے)

ہمیں اپنے شہداء کو کبھی فراموش نہیں کرنا چاہیے جنہوں نے مادرِ وطن کے لیے اپنی جانوں کا نذرانہ پیش کیا۔چیئرمین میر صفدر عمرانی نے نوجوان نسل کو پیغام دیتے ہوئے کہا کہ وہ پاک فوج کے کردار اور قربانیوں کو سمجھے، اور اسی جذبے سے ملک کی خدمت کریں "آج کا دن ہمیں اتحاد، قربانی اور حب الوطنی کا درس دیتا ہے۔ ہم سب کو اپنے دائرہ کار میں رہتے ہوئے ملک کی ترقی اور سلامتی کے لیے کردار ادا کرنا چاہیے انہوں نے عوام سے اپیل کی کہ یومِ دفاع کے موقع پر شہداء کے لیے خصوصی دعاؤں کا اہتمام کریں اور ان کے خاندانوں کے ساتھ یکجہتی کا اظہار کریں۔\378