شادی سے پہلے نئے جوڑے آنکھیں ٹیسٹ کرائیں ،سرجن ڈاکٹر مختار احمد

کراچی (اُردو پوائنٹ اخبارتازہ ترین - این این آئی۔ 05 ستمبر2025ء)پاکستان میں آنکھوں کے امراض کے معروف سرجن ڈاکٹر محمد مختار احمدنے شادی کے بندھن میں بندھنے والے نئے جوڑوں سے شادی سے قبل آنکھوں کا ٹیسٹ کرانے کی ہدایت دیتے ہوئے کہا ہے کہ نکاح سے پہلے دلہا اور دلہن کو اپنی آنکھوں کا ٹیسٹ ضرور کرا لینا چاہیے تاکہ انہیں یہ معلوم ہو سکے کہ ان کی آنکھوں میں کوئی ایسی بیماری تو نہیں جو موروثی ہو اور انکے ہونے والے بچوں کی آنکھوں پر اثر انداز ہوسکیں ۔

ڈاکٹر محمد مختار احمد نے میڈیا سے گفتگو میں کہا کہ بچوں کے والدین یا ان کے بزرگوں کی آنکھوں میں رہنے والی بیماری کی وجہ سے بچوں کی آنکھ کے کچھ حصے متاثر ہو سکتے ہیں جس کی وجہ سے انکی آنکھوں پر چشمہ لگ جاتا ہے ۔

(جاری ہے)

انہوں نے کہا کہ چشمہ موبائل یا ٹی وی دیکھنے کی وجہ سے نہیں نہیں لگتا، آنکھ میں کوئی بیماری نہیں آتی، چاہے کتنا ہی کتابیں پڑھ لیں یا ٹی وی دیکھ لیں،اس سے آنکھ خراب نہیں ہوتی لیکن البتہ آنکھوں پر برے اثرات پڑ سکتے ہیں۔

ڈاکٹر مختار احمد نے یہ بھی کہا کہ ٹی وی کی لائٹ خراب ہو تو انکھوں پر کچھ اثر پڑتا ہے اور دیکھنے میں الجھن ہوتی ہے جس کی وجہ سے آنکھوں کو معمولی سی مشکل پیش آسکتی ہے سکتی ہے لیکن آنکھیں خراب نہیں ہوتیں۔ ڈاکٹر مختار نے کہا کہ شادی سے پہلے پتہ کرنا چاہیے کہ لڑکا اور لڑکی میں کوئی ایسی بیماری تو نہیں جو مورثی ہو اور وہ ان کے بچوں میں نہ آ جائے اس لئے شادی سے پہلے انکھوں کا ٹیسٹ ضرور کرا لینا چاہیے ۔

انہوں نے آنکھوں میں ہونے والی سب سے زیادی بیماری کے حوالے سے بتایا کہ کیٹرک (سفید موتیا) آج کے دور میں آنکھوں میں ہونے والی سب سے بڑی بیماری ہے، شوگر کے مضر اثرات آنکھوں کے پردے پر پڑتے ہیں اس لئے جن لوگوں کو شوگرکا مرض لاحق ہے وہ ہر سال انکھوں کا معائنہ کرائیں، انکھوں کی فوٹوگرافی ہونی چاہیے اور فورا اس کے علاج پر توجہ دینی چاہیے۔

ڈاکٹر مختارنے بتایا کہ انہوں نے ایک این جی او ایلزا ویلفیئر آرگنائزیشن بھی قائم کی ہے اور اس کے ذریعہ نواب شاہ میں آنکھوں کا جدید ہسپتال بھی قائم کیا ہے جہاں روزانہ 150 افراد کومفت او پی ڈی فراہم کی جارہی ہے اور ماہانہ تقریبا 150 غریب مستحق افراد کی آنکھوں کا آپریشن بھی کیا جاتا ہے،میری کوشش ہے کہ کراچی کے مضافات میں آئی ٹیسٹنگ موبائل سہولت فراہم کروں اور جلد ہی ہم مخیر افراد کے تعاون سے یہ سلسلہ بھی شروع کردیں گے۔

ڈاکٹر مختار احمدجو ریٹینا یعنی انکھ کا پردہ بصارت کے ماہر ہیں ، نے بتایا کہ انہوںنے اپنی زندگی میں جو خوشی مستحق اور غریب افراد کی آنکھوں کا علاج اور آپریشن کرکے کمائی وہ مجھے مالدار لوگوں کا علاج کرکے نہیں ملی،میں نے سابق وزیراعظم میر ظفر اللہ جمالی،سابق گورنر سندھ اور ممتاز طبیب حکیم محمدسعید،معروف بینکرآغا حسن عابدی،جی اعلانہ،ضیاء محی الدین،گلوکار مہدی حسن،گلوکارہ ملکہ پکھراج،فریدہ خانم،ٹیناثانی، سابق صدر پاکستان جنرل پرویز مشرف کی والدہ سمیت بے شمار معروف شخصیات کی آنکھوں کا علاج کیا۔

انہوں نے کہا کہ مجھے اعزاز حاصل ہے کہ سابق صدر پاکستان فارق احمدخان لغاری نے بطور صدر پاکستان مجھے پاکستان کے قیام کے 50سال مکمل ہونے کے موقع پر پرائیڈ آف پرفارمنس عطا کیا ۔