جنگیں ہتھیاروں سے نہیں عزم وحوصلے سے لڑی جاتی ہیں،آفاق احمد

ستمبر کا دن پاکستان کی تاریخ میں اہم سنگ میل کی حیثیت رکھتا ہے،فرزندانِ پاکستان کی لازوال قربانیوں کی بدولت آج ہم خودمختار قوم ہیں،6ستمبر کوشروع ہونے والی جنگ کی کامیابی کی بڑی اور اہم وجہ قوم اور افواج ِپاکستان کی یکجہتی و اتحاد تھا،چیئرمین مہاجرقومی موومنٹ

جمعہ 5 ستمبر 2025 21:10

کراچی(اُردو پوائنٹ اخبارتازہ ترین - این این آئی۔ 05 ستمبر2025ء)مہاجرقو می موومنٹ (پاکستان)کے چیئر مین آفاق احمدنے کہا کہ 6 ستمبر کا دن پاکستان کی تاریخ کا اہم ترین دن تصور کیا جاتا ہے،جب پاکستان کی مسلح افواج اورپاکستانی قوم نے بھارتی جارحیت کے خلاف اپنی آزادی اور قومی وقار کے دفاع کیلئے جرات اور بہادری کا بھر پور مظاہرہ کرکے بزدل،مکاروعیار دشمن کے ناپاک اور گھنانے عزائم کو خاک میں ملادئیے تھے۔

آفاق احمد نے کہا کہ ان فرزندان پاکستان کی بے مثال و لازوال قربانیوں کی بدولت آج ہمیں باوقار مقام حاصل ہے،جس کی جتنی تعریف کی جائے وہ کم ہے،17روزتک جاری رہنے والی جنگ میں ہم عددی اور جنگی سازوں سامان میں کئی گنا کمزور اور کم ہونے کے باوجود ہمارے حوصلے اور جذبے چٹان سے زیادہ مضبوط اور فلک سے زیادہ بلند تھے جوانوں کے جوش کا یہ عالم تھا کہ وطنِ عزیز کیلئے جانیں نچھاور کرنے کیلئے بے قرار اور بے چین تھے یہ حقیقت ہے کہ جنگیں ہتھیاروں سے نہیں حوصلے ا ورجذبوں سے لڑی جاتی ہیں جسکی زندہ اور جاویدہ مثال 1965کی جنگ ہے۔

(جاری ہے)

آفاق احمد نے کہا کہ بہادر اور باصلاحیت افواج و قوم نے نہ صرف دشمن کے تما م حربے خاک میں ملادئیے بلکہ بدترین شکست نے دشمن کو بھاگنے پر مجبور کردیا تھا،6ستمبر کوشروع ہونے والی جنگ کی جیت اور کامیابی بڑی اور اہم وجہ قوم اور مسلح افواج کی یکجہتی و اتحاد کے ساتھ ساتھ ملک سے محبت کا وہ جزبہ تھا جسے دیکھ کر دشمن دنگ رہ گیا تھا۔آفاق احمدنے کہا کہ دشمن ہماری کامیابی کی وجہ سے بخوبی آگا ہ ہوچکا ہے،جس کی بنا پر میدان جنگ میں ہمارے مقابلے میں آنے کے بجائے ہمارے اتحاد اور یکجہتی کو نقصان پہنچانے کی سازش کو اپنی اولین ترجیح بنائے ہوئے ہے،جس کو تمام قوم نے ملکر ناکام بنانا ہوگا،قوم کا متحد اور منظم انداز دشمن کو ایک آنکھ نہیں بھاتا،جسے نقصان اور سبوتاژ کرنے کی نت نئی سازشیں رچانے میں لگارہتا ہے۔