7ستمبریوم فضائیہ کا تاریخی دن ہمیں پاک فضائیہ کے بہادر سپوتوں کی جرأت اور قربانیوں کی یاد دلاتا ہے،کمشنر فیصل آباد

اتوار 7 ستمبر 2025 14:50

فیصل آباد (اُردو پوائنٹ اخبارتازہ ترین - اے پی پی۔ 07 ستمبر2025ء) کمشنر فیصل آباد راجہ جہانگیر انور نے یوم فضائیہ کے موقع پر اپنے پیغام میں کہا ہے کہ 7ستمبریوم فضائیہ کا تاریخی دن ہمیں پاک فضائیہ کے بہادر سپوتوں کی جرأت اور قربانیوں کی یاد دلاتا ہے۔ آج ہم ان شہدا کو سلام پیش کرتے ہیں جنہوں نے مادرِ وطن کے دفاع کے لیے اپنی جانیں نچھاور کیں۔

کمشنر نے پاک فضائیہ کے جانبازوں اور شہدا کو شاندار خراج عقیدت پیش کرتے ہوئے کہا کہ پاک فضائیہ نے بانی پاکستان قائداعظم محمد علی جناح کے وژن کے مطابق اپنے آپ کو ایک اعلیٰ اور پیشہ ور ادارے کے طور پر منوایا ہے یہی وجہ ہے کہ آج اس کی پیشہ ورانہ مہارت دنیا کی کسی بھی فضائیہ سے ک کسی طرح بھی کم نہیں۔ انہوں نے کہا کہ1965 کی پاک بھارت جنگ میں پاک فضائیہ کے جوانوں کی شجاعت اور قربانیاں ہمیشہ یاد رکھی جائیں گی۔

(جاری ہے)

یہ دن نئی نسل کو بہادری اور لگن کے جذبے کی یاد دہانی کراتا ہے۔حالیہ تاریخ میں بھی پاک فضائیہ نے اپنی اعلیٰ صلاحیتوں کا مظاہرہ کرتے ہوئے دہشت گردوں کے خلاف آپریشن بنیان مرصوص میں فیصلہ کن کردار ادا کیا۔بنیان مرصوص کامیاب آپریشن سے دنیا بھر میں پاکستان کا وقار بلند ہوا ہے۔ انہوں نے کہا کہ پاک فضائیہ کی پیشہ ورانہ مہارت، بے باک قیادت اور جنگی صلاحیتیں اس بات کا ثبوت ہیں کہ وہ کسی بھی بڑے دشمن کو شکست دینے کی صلاحیت رکھتی ہے اورہمیں یقین ہے کہ پاک فضائیہ آئندہ بھی مادرِ وطن کی خودمختاری، فضائی و زمینی سرحدوں اور علاقائی سالمیت کے تحفظ کے لیے ہر وقت تیار رہے گی۔