ایشین کرکٹ کونسل کے چیئرمین محسن نقوی کا دبئی انٹرنیشنل کرکٹ اسٹیڈیم کا دورہ، ایشیا کپ میں شریک ٹیموں کے کپتانوں سے ملاقات

منگل 9 ستمبر 2025 21:54

دبئی (اُردو پوائنٹ اخبارتازہ ترین - اے پی پی۔ 09 ستمبر2025ء) ایشین کرکٹ کونسل (اے سی سی) کے چیئرمین محسن نقوی نے دبئی انٹرنیشنل کرکٹ اسٹیڈیم کا دورہ کیا اور ایشیا کپ میں شریک تمام ٹیموں کے کپتانوں سے ملاقات کی۔پاکستان کرکٹ بورڈ(پی سی بی) کی جانب سے جاری بیان کے مطابق انہوں نے پاکستانی ٹیم کے کپتان سلمان آغا، بھارتی کپتان سوریا کمار یادیو، افغانستان کے کپتان راشد خان، بنگلہ دیش کے کپتان لٹن داس، ہانگ کانگ کے کپتان یاسم مرتضیٰ، سری لنکا کے کپتان چارتھ اسالنکا، یو اے ای کے کپتان محمد وسیم اور عمان کے کپتان جتندر سنگھ کو خوش آمدید کہا اور ان کے لیے نیک خواہشات کا اظہار کیا۔

اس موقع پر چیئرمین اے سی سی نے کہا کہ ایشیا کپ نہ صرف پاکستان اور بھارت جیسے روایتی حریفوں کے درمیان مقابلوں کا جوش بڑھائے گا بلکہ دیگر ٹیموں کے دلچسپ میچز بھی شائقین کرکٹ کو محظوظ کریں گے۔

(جاری ہے)

انہوں نے کہا کہ ایمریٹس کرکٹ بورڈ نے اے سی سی کے ساتھ مل کر شاندار انتظامات کیے ہیں تاکہ ایونٹ کو یادگار بنایا جا سکے۔ محسن نقوی نے کہا کہ ایشیا کپ خطے کے ممالک کو قریب لانے کا بہترین ذریعہ ہے، کرکٹ محض کھیل نہیں بلکہ دلوں کو جوڑنے اور محبتیں بانٹنے کا خوبصورت موقع ہے۔

انہوں نے کہا کہ تمام بورڈز اور ٹیمیں اس ٹورنامنٹ کے کامیاب انعقاد کیلئے پرعزم اور پرجوش ہیں۔ تقریب میں چیف آپریٹنگ آفیسر پی سی بی سمیر احمد، چیف ایگزیکٹو آفیسر پی ایس ایل سلمان نصیر سمیت مختلف بورڈز کے اعلیٰ حکام بھی شریک ہوئے۔