eبلوچستان حکومت و اپوزیشن جماعتوں کے درمیان مذاکرات

ض*گرفتار کارکنوں کی رہائی اور بلوچستان بھر میں درج مقدمات واپس لینے کا فیصلہ

منگل 9 ستمبر 2025 19:40

کوئٹہ (اُردو پوائنٹ اخبارتازہ ترین - آن لائن۔ 09 ستمبر2025ء) بلوچستان حکومت و اپوزیشن جماعتوں کے درمیان مذاکرات، گرفتار کارکنوں کی رہائی اور بلوچستان بھر میں درج مقدمات واپس لینے کا فیصلہ۔کمشنر آفس کوئٹہ میں وزیر اعلی بلوچستان میر سرفراز خان بگٹی کی ہدایت پر حکومت اور اپوزیشن جماعتوں کے درمیان اہم اجلاس منعقد ہوا۔ اجلاس میں حکومتی وفد کی نمائندگی صوبائی وزرامیر ظہور احمد بلیدی، میر شعیب نوشیروانی، بخت محمد کاکڑجبکہ زمرک خان اچکزئی بطور ثالث شرکت کی۔

اپوزیشن جماعتوں کی جانب سے بلوچستان نیشنل پارٹی کے ایڈوکیٹ ساجد خان ترین، اختر حسین لانگو، آغا حسن بلوچ،پشتونخوامیپ کے تالیمند خا ن، مجید خان اچکزئی،کبیر خان افغان،نیشنل پارٹی کے چیئرمین اسلم بلوچ،چنگیز حئی بلوچ،عوامی نیشنل پارٹی کے اصغر خان اچکزئی، رشید خان ناصر،ولی داد میانی،پاکستان تحریک انصاف کے ایڈوکیٹ سلام آغا، ملک فیصل دہوار،جماعت اسلامی کے زاھد اختر بلوچ،جمیل احمد مشوانی اور مجلس وحدت المسلمین کے مولانا ولایت حسین اور محمد یونس سمیت مختلف سیاسی جماعتوں کے عہدیدار شریک ہوئے۔

(جاری ہے)

اجلاس میں حکومتی وفد نے وزیراعلی بلوچستان میر سرفراز بگٹی کی ہدایت پر خیر سگالی کے طور پرسیاسی جماعتوں کے گرفتار شدگان کی رہائی اور بلوچستان بھر میں درج مقدمات واپس لینے کا اعلان کیا۔ اجلاس میں یہ بھی طے پایا کہ اپوزیشن وفد ضلعی انتظامیہ کے ساتھ مل کر جامع ایس اوپیز کے مطابق جلسہ جلوس کا انعقاد کریں گی۔مزید براں اپوزیشن وفد نے یقین دلایا کہ قانون کی مکمل پاسداری کی جائے گی اور عوامی املاک کا تحفظ ہرصورت یقینی بنایاجائے گا۔

اجلاس میں اپوزیشن جماعتوں نے انتظامیہ کو یقین دہانی کرائی کہ احتجاج کے دوران کسی بھی قسم کا پرتشدد واقعہ یا نقصان دہ کارروائی نہیں ہوگی اور تمام سرگرمیاں طے شدہ ایس او پیز کے مطابق انجام دی جائیں گی۔اجلاس میں کمشنر کوئٹہ ڈویژن شاہزیب خان کاکڑ اور ڈپٹی کمشنر کوئٹہ کیپٹن مہر اللہ بادینی بھی موجود تھے۔