پی ٹی آئی انتہاء پسند جماعت ،سیاست سے کوئی تعلق نہیں، راجہ انصاری ایڈووکیٹ

اڈیالہ جیل کے باہر پی ٹی آئی ائی کے کارکنوں کا صحافیوں پر حملہ آزادی صحافت پر کھلا وار ہے،ترجمان حکومت پاکستان برائے سندھ

منگل 9 ستمبر 2025 19:40

کراچی(اُردو پوائنٹ اخبارتازہ ترین - این این آئی۔ 09 ستمبر2025ء)ترجمان حکومت پاکستان برائے سندھ راجا خلیق الزمان انصاری نے کہا ہے کہ پاکستان تحریک انصاف ایک انتہا پسند جماعت ہے جس کا جمہوری سیاست سے کوئی تعلق نہیں۔ یہ اقتدار میں ہوں یا اپوزیشن میں، اپنے ناقدین کو ہمیشہ گالم گلوچ، دھمکیوں اور تشدد سے جواب دیتے ہیں۔انہوں نے کہا کہ اڈیالہ جیل کے باہر پی ٹی آئی کارکنوں کی جانب سے صحافیوں پر تشدد اس کی تازہ ترین مثال ہے۔

صحافی طیب بلوچ پر ہاتھا پائی اور اعجاز احمد سمیت دیگر صحافیوں کے ساتھ بدسلوکی صرف اس لیے کی گئی کہ انہوں نے علیمہ خان سے ان کی جائیدادوں کے متعلق سوال کیا۔ یہ عمل آزادی صحافت پر حملہ اور سچ کو دبانے کی ناکام کوشش ہے۔راجا خلیق الزمان انصاری نے کہا کہ وہ اس بزدلانہ حرکت کی سخت ترین الفاظ میں مذمت کرتے ہیں اور متاثرہ صحافیوں کے ساتھ اپنی مکمل یکجہتی کا اظہار کرتے ہیں۔

(جاری ہے)

آزادی صحافت کسی بھی جمہوری معاشرے کی بنیاد ہے، صحافی عوام کے حقِ جانکاری کے محافظ ہیں، ان پر حملہ دراصل عوام پر حملہ ہے۔انہوں نے کہا کہ حکومت پاکستان آزادی صحافت کے اصول پر مکمل یقین رکھتی ہے اور صحافیوں کو یقین دلاتی ہے کہ حکومت ان کے ساتھ کھڑی ہے۔ سچائی کا ساتھ دینا ہی قوم کو ترقی کی طرف لے جا سکتا ہے اور ہم اس راستے پر ڈٹے رہیں گے۔