بھارت سے راوی اور ستلج میں پانی چھوڑنے کا سلسلہ رک چکا ہے‘عرفان علی کاٹھیا

بدھ 10 ستمبر 2025 15:21

لاہور(اُردو پوائنٹ اخبارتازہ ترین - این این آئی۔ 10 ستمبر2025ء)صوبائی ڈیزاسٹر مینجمنٹ اتھارٹی کے ڈائریکٹر جنرل عرفان علی کاٹھیا نے کہا ہے کہ بھارت صرف اپنی ضرورت کے مطابق اپنی ڈائون اسٹریم نہروں میں پانی چھوڑ رہا ہے، بھارت سے راوی اور ستلج میں پانی چھوڑنے کا سلسلہ رک چکا ہے،جلالپور پیر والا کی صورتحال انتہائی خراب ہے، جلالپور پیروالا کو تین دریائوں کا پانی متاثر کر رہا ہے، دریائے راوی، چناب اور ستلج بھی جلالپور پیروالا کو متاثر کر رہا ہے۔

نجی ٹی وی سے گفتگو کرتے ہوئے انہوںنے کہاکہ چند گھنٹے پہلے ایک شگاف پڑنے سے پانچ چھ مزید آبادیاں متاثر ہونے کا خدشہ ہے، تمام لوگوں کے انخلا ء کو یقینی بنایا جا رہا ہے،175 سے زائد ریسکیو کی بوٹس جلال پور پیروالا میں کام کر رہی ہیں، لوگوں نے انخلا ء سے گریز کیا جو ہمارے لیے ایک چیلنج بنا ہے، شگاف پر کرنے کے لیے تمام مشینری کام کر رہی ہے۔

(جاری ہے)

ڈی جی پی ڈی ایم اے عرفا ن کاٹھیا نے بتایا کہ پاک آرمی ایک ہفتہ سے ریسکیو کے ساتھ جلالپور پیروالا میں موجود ہے۔نارووال، شیخوپورہ، لاہور، ننکانہ میں پانی کے بہا ئومیں بتدریج کمی آ رہی ہے، سیالکوٹ، گوجرانوالہ، وزیرآباد، حافظ آباد، چنیوٹ میں کافی تیزی سے پانی اتر رہا ہے۔عرفان علی کاٹھیا نے کہا کہ پانی اترنے والے علاقوں میں ریلیف کیمپوں سے لوگ واپس جا رہے ہیں، اگلے تین دن کا بڑا چیلنج سائوتھ پنجاب ہے، ملتان کی صورتحال تشویشناک ہے، مظفرگڑھ، لیاقت پور اور رحیم یارخان کی صورتحال تشویشناک ہوگی۔