انتظامی مسائل کے باعث 4 پروازیں منسوخ، 33 تاخیر کا شکار

کراچی سے تربت اور لاہور سے کراچی کی 4 پروازیں منسوخ کر دی گئیں

بدھ 10 ستمبر 2025 16:58

اسلام آباد /کراچی /لاہور /ملتان (اُردو پوائنٹ اخبارتازہ ترین - این این آئی۔ 10 ستمبر2025ء)ایئر لائنز کے انتظامی مسائل کی وجہ سے 4 پروازیں منسوخ اور 33 تاخیر کا شکار ،ایک متبادل ایئر پورٹ پر اتاری گئی۔فلائٹ شیڈول کے مطابق کراچی سے تربت اور لاہور سے کراچی کی 4 پروازیں منسوخ کر دی گئیں۔30 گھنٹے سے پھنسے لاہور کے عمرہ زائرین کو متبادل طیارے پر کراچی سے جدہ روانہ کیا گیا اور ابوظبی سے پشاور کی پرواز پی کے 218 انتظامی طور پر اسلام آباد ایئرپورٹ پر اتاری گئی۔

(جاری ہے)

اسلام اباد ایئرپورٹ کی 11 پروازیں 1 سے ڈیڑھ گھنٹے اور لاہور ایئرپورٹ کی 12 پروازوں میں ایک سے 17 گھنٹے تاخیر کا شکار ہیں،لاہور سے جدہ کی پرواز پی اے 470 کی روانگی میں 17 گھنٹے جبکہ سیالکوٹ سے ابوظبی کی قومی ایئرلائن کی پروازوں پی کے 177 اور 178 میں 11 گھنٹے کی تاخیر کا بتایاگیا۔طیارہ خراب ہونے کی وجہ سے ملتان سے دبئی جانے والی غیرملکی پرواز ایف زیڈ 340 کی روانگی میں 9 گھنٹے کی تاخیر کا بتایاگیا۔ملتان سے شارجہ جانے والی قومی ایئر لائن کی پرواز پی کے 293 میں 6 گھنٹے جبکہ کوئٹہ سے لاہور کی 2 پروازوں پی کے 322 اور 323 میں 3 گھنٹے تاخیر کا شکار ہوئیں۔