ٹک ٹاکر سمیعہ حجاب کے مبینہ اغوا اور دھمکیوں کا کیس، عدالت نے ملزم حسن زاہد کی ضمانت خارج کردی

بدھ 10 ستمبر 2025 22:43

اسلام آباد (اُردو پوائنٹ اخبارتازہ ترین - این این آئی۔ 10 ستمبر2025ء)ٹک ٹاکر سمیعہ حجاب کے مبینہ اغوا اور دھمکیوں کے کیس میں عدالت نے ملزم حسن زاہد کی ضمانت خارج کرتے ہوئے جوڈیشل ریمانڈ پر جیل بھیجنے کا حکم دے دیا۔کیس کی سماعت جوڈیشل مجسٹریٹ یاسر محمود چوہدری نے کی، ملزم زاہد حسین کو عدالت کے روبرو پیش کیا گیا۔ پولیس نے اغوا کے مقدمے میں مزید آٹھ روزہ جسمانی ریمانڈ کی استدعا کی۔

عدالت کو بتایا گیا کہ ملزم سے موبائل، گاڑی اور اسلحہ برآمد کرنا ہے ۔

(جاری ہے)

ملزم کی نشاندہی پر دیگر ملزمان کی گرفتاری بھی عمل میں لائی جائے گی۔وکیل صفائی نے بتایا حسن زاہد اور خاتون سمیہ حجاب کی منگنی ہو چکی ہے، دوسری ایف ائی آر میں گرفتار کیا گیا تو وقوعہ کے وقت ملزم ریسٹ ہاس میں موجود تھا، عدالت نے دونوں طرف کے وکلا کے دلائل سن کر دھمکیاں دینے اور نقدی چھیننے کے مقدمے میں ملزم کا دو دن کا جسمانی ریمانڈ منظور کر لیا جبکہ اغوا کے مقدمے میں ملزم کی ضمانت خارج کرتے ہوئے اسے جیل بھیجنے کا حکم دے دیا۔ عدالتی حکم کے بعد پولیس نے اغواء کے کیس میں ملزم کی دوبارہ گرفتاری ڈال دی۔