وفاقی وزیر داخلہ محسن نقوی سے یو اے ای کی نیشنل اینٹی نارکوٹکس اتھارٹی کے چیئرمین شیخ زید بن حماد بن حمدان النیہان کی ملاقات

اسلام آباد (اُردو پوائنٹ اخبارتازہ ترین - اے پی پی۔ 11 ستمبر2025ء) وفاقی وزیر داخلہ محسن نقوی سے متحدہ عرب امارات کی نیشنل اینٹی نارکوٹکس اتھارٹی کے چیئرمین شیخ زید بن حماد بن حمدان النیہان نے وزارت داخلہ میں ملاقات کی جس میں انسداد منشیات سمیت باہمی دلچسپی کے امور پر تفصیلی تبادلہ خیال ہوا۔ ملاقات میں پاکستان اور یو اے ای نے انسداد منشیات کے حوالے سے تعاون کو مزید فروغ دینے پر اتفاق کیا۔

پاکستان کی جانب سے ڈی جی اے این ایف میجر جنرل عبدالمعید جبکہ یو اے ای کی طرف سے بریگیڈئر طاہر غریب کو رابطہ افسر مقرر کرنے کا فیصلہ کیا گیا تاکہ عملی سطح پر دونوں ممالک کے درمیان مربوط تعاون کو یقینی بنایا جا سکے۔وفاقی وزیر داخلہ محسن نقوی نے متحدہ عرب امارات میں نیشنل اینٹی نارکوٹکس اتھارٹی کے قیام کو سراہتے ہوئے شیخ زید بن حماد بن حمدان النیہان کو اتھارٹی کا پہلا چیئرمین بننے پر مبارکباد دی۔

(جاری ہے)

انہوں نے کہا کہ اس اتھارٹی کے قیام سے دونوں ممالک کے درمیان انسداد منشیات کے شعبے میں تعاون مزید مضبوط ہوگا۔محسن نقوی نے کہا کہ پاکستان منشیات کے خلاف جنگ میں ہراول دستے کا کردار ادا کر رہا ہے اور مکروہ کاروبار میں ملوث عناصر کے خلاف آہنی ہاتھوں سے نمٹا جا رہا ہے۔ انہوں نے بتایا کہ متحدہ عرب امارات میں انسداد منشیات کی کارروائیوں میں 400 ملزمان کو گرفتار کیا گیا جبکہ 5 ٹن منشیات پکڑی گئیں جو بروقت معلومات کے تبادلے اور مشترکہ کوششوں سے ممکن ہوا۔

وفاقی وزیر داخلہ نے اعتراف کیا کہ حالیہ عرصے میں سنتھیٹک ڈرگز کی سمگلنگ میں اضافہ ہوا ہے تاہم اس مافیا کے خلاف بھرپور کریک ڈائون جاری ہے۔ انہوں نے کہا کہ "منشیات کے خلاف جنگ دراصل ہماری نسلوں کے تحفظ کی جنگ ہے اور اس میں ہار کوئی آپشن نہیں۔"شیخ زید بن حماد بن حمدان النیہان نے پاکستان کے کردار کو سراہتے ہوئے کہا کہ یو اے ای انسداد منشیات کے ضمن میں ہرممکن تعاون فراہم کرے گا۔

ان کا کہنا تھا کہ باہمی اشتراک کو مزید مستحکم بنا کر ہم آنے والی نسلوں کو منشیات سے پاک روشن مستقبل دے سکتے ہیں۔اس موقع پر یو اے ای کا اعلیٰ سطحی وفد بھی موجود تھا جس میں بریگیڈئر طاہر غریب، بریگیڈیئر عمر خلفان، بریگیڈیئر خالد علی، بریگیڈیئر ابراہیم جاسم، بریگیڈیئر ماجد سلطان، کرنل محمد ماجد، کرنل خالد راشد، لیفٹیننٹ کرنل جمال سعید، لیفٹیننٹ کرنل سعید محمد، میجر محمد سلطان اور کیپٹن سالم خمیس شامل تھے۔پاکستان کی طرف سے وزیر مملکت داخلہ طلال چوہدری، وفاقی سیکرٹری داخلہ، سپیشل سیکرٹری داخلہ، ایڈیشنل سیکرٹریز داخلہ، ڈی جی اینٹی نارکوٹکس فورس اور دیگر سینئر حکام نے بھی اجلاس میں شرکت کی۔