،عوام کے ساتھ نامناسب رویہ اور گالم گلوچ کرنے والے اہلکاروں کے خلاف کارروائی عمل میں لائی جائے،انجمن اتحاد اخبارفروشاں

جمعرات 11 ستمبر 2025 22:25

: کوئٹہ (اُردو پوائنٹ اخبارتازہ ترین - آن لائن۔ 11 ستمبر2025ء)انجمن اتحاد اخبارفروشاں نے ٹریفک پولیس کی جانب سے موٹرسائیکل سواروں کو ناجائز تنگ کرنے اوراخبار فروشوں اور شہریوں کے ساتھ نامناسب رویئے کی مذمت کرتے ہوئے ایس پی ٹریفک اوردیگراعلی حکام سے مطالبہ کیا ہے کہ عوام کے ساتھ نامناسب رویہ اور گالم گلوچ کرنے والے اہلکاروں کے خلاف کارروائی عمل میں لائی جائے بصورت دیگر انجمن اتحاد اخبارفروشاں احتجاج پر مجبور ہوگی۔

یہاں جاری ہونے والے ایک بیان میں کہا گیا ہے کہ گزشتہ روز لیاقت بازارمیں ٹریفک پولیس اہلکاروں نے کئی موٹرسائیکلوں کو اٹھاکرصرف ا س لئے گاڑی میں ڈال دیا کہ وہ غلط پارک ہیں جبکہ لیاقت بازارمیں اسوقت درجنوں گاڑیاں پارکنگ کی گئیں تھیں جن کے خلاف کوئی کارروائی نہیں کی گئی۔

(جاری ہے)

بیان میں کہا گیا کہ ٹریفک پولیس اہلکاروں نے ایک اخبارفروش کی موٹرسائیکل بھی گاڑی میں ڈال دی کاغذات اور نمبر پلیٹ کے باوجود 500روپے کا چالان کیا گیا جو ایزی پیسہ کے ذریعے ادا کردیا گیا جب جرمانہ ادا کرکے پولیس اہلکاروں سے کاغذات اور موٹرسائیکل واپس کرنے کیلئے کہا گیا تو ٹریفک پولیس اہلکاروں نے اخبار فروشوں کو نہ صرف گالیاں دیں بلکہ نامناسب رویہ بھی اختیارکیا جس کی انجمن اتحاد اخبارفروشاں سخت الفاظ میں مذمت کرتی ہے۔

انجمن اتحاد اخبار فروشاں نے آئی جی پولیس، ایس پی ٹریفک اوردیگراعلی حکام سے مطالبہ کیا کہ شہریوں کو ناجائز تنگ کرنے،شہریوں کے ساتھ گالم گلوچ میں ملوث اہلکاروں کے خلاف کارروائی عمل میں لائی جائے بصورت دیگر انجمن اتحاد اخبار فروشاں سخت احتجاج پر مجبور ہوگی