Live Updates

سردار محمد یوسف سے ایرانی سفیر کی ملاقات،حالیہ بارشوں اور سیلاب سے جانی و مالی نقصان پر افسوس کا اظہار

جمعہ 12 ستمبر 2025 15:00

اسلام آباد(اُردو پوائنٹ اخبارتازہ ترین - این این آئی۔ 12 ستمبر2025ء)وفاقی وزیر مذہبی امور سردار محمد یوسف سے ایرانی سفیر ڈاکٹر رضا امیری مقدم نے جمعہ کو ملاقات کی۔ ایرانی سفیر نے پاکستان میں حالیہ بارشوں اور سیلاب سے جانی و مالی نقصان پر افسوس کا اظہار کیا۔ ایرانی سفیر نے کہا کہ پاکستان برادر ہمسایہ ملک ہے، آزمائش کی اس گھڑی میں پاکستانی عوام کے ساتھ شانہ بشانہ کھڑے ہیں۔

ملاقات کے دوران دنیا میں مذہبی عدم برداشت دہشت گردی، فرقہ واریت کے خاتمے، اور بین المذاہب ہم آہنگی کے فروغ کیلئے تجاویز پر تبادلہ خیال کیا گیا۔ اس موقع پر وزیر مذہبی امور نے کہا کہ ایران اور عراق جانے والے پاکستانی زائرین کو ریگولرائز کیا جارہا ہے،زائرین اور روزگار کیلئے ایران جانے والے پاکستانیوں سے متعلق ایران کے ساتھ جلد ایم او یو (یاداشت)پر دستخط کریں گے۔

(جاری ہے)

وزارت مذہبی امور، وزارت داخلہ اور وزارت سمندر پار پاکستانیز کی معاونت سے ایم او یو تیار کر رہے ہیں۔ایرانی سفیر نے 50 ویں بین الاقوامی سیرت کانفرنس کے انعقاد پر وفاقی وزیر سردار محمد یوسف اور حکومت پاکستان کو مبارکباد دی اور کہا کہ سیرت النبی ؐکی روشنی میں سوشل میڈیا سمیت دور حاضر کے مسائل کے حل کیلئے مل کر کوشش کرنا ہو گی،اسرائیل کے ایران پر حملے کے دوران پاکستان کے کردار پر حکومت پاکستان اور عوام کے شکرگزار ہیں۔

انہوںنے کہاکہ اسلاموفوبیا اور دہشتگردی کے خلاف جنگ میں پاکستان کا کردار انتہائی اہم ہے۔ وزیر مذہبی امور نے کہا کہ پاکستان رواں سال نومبر میں بین الاقوامی قرآن قرآت مقابلوں کا انعقاد کریگا۔ ایرانی سفیر نے کہا کہ عالمی سیرت کانفرنس کے بعد بین الاقوامی قرآن قرآت مقابلوں کا انعقاد پاکستان کیلئے منفرد اعزاز ہوگا۔پاکستان اور ایران نے اس ملاقات کے دوران حج اور عمرہ کی ادائیگی، جدید عصری تعلیم کے فروغ کیلئے علماء کرام اور مدارس کے طلباء کے تبادلے بڑھانے پر اتفاق کیا۔