Live Updates

سیلاب متاثرین کی بحالی کیلئے عمران خان کو ’ٹیلی تھون‘ کی ذمہ داری سونپنے کا مطالبہ

متاثرین کی بحالی کیلئے جس عزم کی ضرورت ہے حکومت اس سے عاری ہے، حکومت اور اس کی مشینری سب اچھا ہے کی رپورٹ دے کر آنکھوں میں دھول جھونک رہی ہے؛ پی ٹی آئی رہنماء مسرت جمشید چیمہ کا بیان

ساجد علی اتوار 14 ستمبر 2025 13:25

سیلاب متاثرین کی بحالی کیلئے عمران خان کو ’ٹیلی تھون‘ کی ذمہ داری ..

لاہور ( اُردو پوائنٹ اخبارتازہ ترین۔ 14 ستمبر 2025ء ) ملک میں سیلاب متاثرین کی بحالی کیلئے سابق وزیراعظم عمران خان کو ’ٹیلی تھون‘ کی ذمہ داری سونپنے کا مطالبہ سامنے آگیا۔ تفصیلات کے مطابق پاکستان تحریک انصاف کی سینئر رہنما مسرت جمشید چیمہ کا کہنا ہے کہ سیلاب سے متاثرہ لاکھوں خاندانوں کی بحالی صرف ویڈیوز اور تصویری سیشنز سے ممکن نہیں بلکہ اس کیلئے غیر معمولی عزم اور ولوے کی ضرورت ہے جس سے موجودہ حکومت عاری نظر آتی ہے۔

اس حوالے سے اپنے ایک بیان میں انہوں نے کہا کہ سوشل میڈیا پر سیلاب متاثرین کی سینکڑوں ویڈیوز سامنے آرہی ہیں جس میں وہ کسی طرح کی حکومتی امدادنہ پہنچنے کے شکوے شکایات کر رہے ہیں لیکن حکومت اور اس کی مشینری سب اچھا ہے کی رپورٹ دے کر آنکھوں میں دھول جھونک رہی ہے، سیلاب متاثرین کی بحالی کیلئے نیشنل اور انٹر نیشنل سطح پر ’ٹیلی تھون‘ کی ضرورت ہے اور اس کیلئے عمران خان کو ذمہ داری سونپی جائے جس سے پاکستان میں بسنے والے، اوورسیز پاکستانیز اور دوست ممالک دل کھول کر امداد کریں گے۔

(جاری ہے)

مسرت جمشید چیمہ کہتی ہیں کہ سیلاب سے جس بڑے پیمانے پر تباہی ہوئی ہے حکومت کو اس کا ادراک نہیں ہے، اس خطرناک صورتحال کے نتائج آنے والے مہینوں اور سالوں میں سامنے آئیں گے جس کا سارا بوجھ عوام کو اٹھانا پڑے گا، حکومت کی رٹ نہ ہونے کی وجہ سے سیلاب کی آڑ میں اشیائے خوردونوش کے ذخیرہ اندوز اندوز اور منافع خور متحرک ہو چکے ہیں، حکومت کی کمزوری کی وجہ سے مافیا اتنا منہ زور ہو چکا ہے کہ عوام آج سبزی نہیں خرید سکتے۔