ایم ڈی پاکستان بیت المال سینیٹر شاہین خالد بٹ کا سیلاب متاثرین کی امداد و بحالی کے عزم کا اعادہ

اسلام آباد (اُردو پوائنٹ اخبارتازہ ترین - اے پی پی۔ 14 ستمبر2025ء) پاکستان بیت المال (پی بی ایم)کے منیجنگ ڈائریکٹر سینیٹر کیپٹن(ر) شاہین خالد بٹ نے سیلاب زدگان کے لیے فوری امداد اور طویل مدتی بحالی کے لیے ادارے کے غیر متزلزل عزم کا اعادہ کرتے ہوئے ملک گیر اتحاد پر زور دیا ہے تاکہ اس بات کو یقینی بنایا جا سکے کہ کوئی بھی پیچھے نہ رہے۔پی بی ایم کی جاری امدادی کوششوں کا جائزہ لینے کے لیے ایک اعلیٰ سطحی آن لائن اجلاس کی صدارت کرتے ہوئے سینیٹر شاہین خالد بٹ نے اس بات پر زور دیا کہ وزیراعظم کی قیادت میں پی بی ایم سیلاب متاثرین کی مشکلات کو کم کرنے کے لیے ہر ممکن کوشش کر رہا ہے۔

منیجنگ ڈائریکٹر نے متاثرہ اضلاع میں امدادی کارروائیوں کے حوالے سے صوبائی اور علاقائی ڈائریکٹرز سے تفصیلی بریفنگ بھی حاصل کی۔

(جاری ہے)

انہیں بتایا گیا کہ بیت المال کا عملہ مقامی انتظامیہ اور فلاحی تنظیموں کے ساتھ مل کر اپنے اپنے علاقوں میں سیلاب سے متاثرہ افراد میں خوراک، خشک دودھ، ادویات، خیمے، کپڑے اور دیگر ضروری اشیاء تقسیم کر رہا ہے۔

انہوں نے اس بات کا اعادہ کیا کہ خوراک، رہائش اور طبی امداد جیسی فوری ضروریات کو پورا کرنا اولین ترجیح ہے۔اپنے اہم اقدام ’’کھانا سب کے لیے‘‘ کے تحت پی بی ایم موبائل فوڈ ٹرکوں کے ذریعے کھانا اور امدادی سامان پہنچا رہا ہے اور نامزد شیلٹر ہومز میں عارضی پناہ گاہ بھی فراہم کر رہا ہے۔ شاہین خالد بٹ نے ہدایت کی کہ انتہائی لگن کے ساتھ متاثرین کی خدمت کی جائے اور ضلعی دفاتر کو پی بی ایم کے سویٹ ہومز اور خواتین کو بااختیار بنانے کے مراکز کے ذریعے عارضی رہائش اور کھانے کے لیے وسائل کو متحرک کیا جائے۔

انہوں نے کہا کہ سویٹ ہومز اور خواتین کو بااختیار بنانے کے مراکز میں سیلاب زدگان کے لیے عارضی رہائش اور کھانے کا انتظام کرنے کے لیے ضلعی دفاتر کو متحرک کیا جائے۔ انہوں نے یہ بھی ہدایت کی کہ متاثرین کی فوری ضروریات کو پورا کرنے کے بعد ان کی معاشی بحالی کے لیے اقدامات کیے جائیں۔سینیٹر کیپٹن (ر)شاہین خالد بٹ نے فوری امداد سے آگے بڑھتے ہوئے اعلان کیا کہ سیلاب سے یتیم ہونے والے بچوں کی تعلیم اور پرورش کے لیے موثر اقدامات کیے جائیں گے۔

انہوں نے معذور افراد کو وہیل چیئر اور مصنوعی اعضاء فراہم کرنے کا بھی عہد کیا۔انہوں نے پاکستان بھر کے مخیر حضرات اور فلاحی تنظیموں پر زور دیا کہ وہ ضرورت مندوں کی مدد کے لیے اپنی مذہبی، انسانی اور قومی ذمہ داریوں کو پورا کرتے ہوئے حکومت کا ہاتھ بٹائیں۔اجلاس میں ڈائریکٹر جنرل پی بی ایم پراجیکٹس پروفیسر ڈاکٹر ذیشان دانش، ڈائریکٹر پراجیکٹس قاسم ظفر اور دیگر اعلیٰ حکام نے بھی شرکت کی۔