انڈونیشیا کے سفیر چندرا وارسی نانتو سکوتجو کی آئی جی پنجاب سے ملاقات، سکیورٹی اور ٹریننگ امور میں دو طرفہ تعاون کو مزید فروغ دینے پر تبادلہ خیال

اتوار 14 ستمبر 2025 21:20

لاہور (اُردو پوائنٹ اخبارتازہ ترین - اے پی پی۔ 14 ستمبر2025ء) پاکستان میں انڈونیشیا کے سفیر لیفٹیننٹ جنرل (ر) چندرا وارسی نانتو سکوتجو نے اپنے وفد کے ہمراہ سنٹرل پولیس آفس لاہور کا دورہ کیا اور آئی جی پنجاب ڈاکٹر عثمان انور سے ملاقات کی۔ وفد میں انڈونیشیا کے ڈیفنس اتاشی کرنل ہنرو ہدایت سوسانتو، فرسٹ سیکرٹری محمد سفیان سر، سیکنڈ سیکرٹری ریکا گارتکا اور پروٹوکول افسر بونار سمیت دیگر افسران شامل تھے۔

ملاقات کے دوران پنجاب پولیس اور انڈونیشیا کے درمیان سکیورٹی اور ٹریننگ امور میں دو طرفہ تعاون کو مزید فروغ دینے پر تبادلہ خیال کیا گیا۔ وفد کو پنجاب پولیس کی جدید ٹیکنالوجی اور آرٹیفیشل انٹیلیجنس پر مبنی اصلاحات، سی ٹی ڈی، کرائم کنٹرول ڈیپارٹمنٹ اور ویلفیئر اقدامات کے بارے میں تفصیلی بریفنگ دی گئی۔

(جاری ہے)

وفد کو سیف سٹیز پراجیکٹ، ورچوئل ویمن پولیس اسٹیشنز، چائلڈ پروٹیکشن سنٹرز، خدمت و تحفظ مراکز، میثاق سنٹرز، تحفظ درسگاہ اور فوسٹر ہوم جیسے عوامی خدمت کے اقدامات سے بھی آگاہ کیا گیا۔

ملاقات میں سکیورٹی اور سیفٹی کے شعبے میں ایک دوسرے کے تجربات سے استفادہ کرنے پر اتفاق کیا گیا۔ اس موقع پر آئی جی پنجاب نے کہا کہ انڈونیشیا کی تیز رفتار ترقی اور اسلامی دنیا و خطے میں قائدانہ کردار قابلِ تحسین ہے۔انڈونیشیا کے سفیر نے دہشت گردی کے خلاف جنگ میں پنجاب پولیس کے شاندار کردار اور کمیونٹی پولیسنگ سمیت عوامی خدمت کے مختلف شعبوں میں تیزی سے ہونے والی ترقی کو سراہا۔

انہوں نے کہا کہ پنجاب پولیس اور انڈونیشیا پولیس ٹریننگ اور استعداد کار بڑھانے کے لیے وفود کا باہمی تبادلہ کریں گے۔آئی جی پنجاب نے وفد کو سنٹرل پولیس ڈیش بورڈ، ہیومن ریسورس مینجمنٹ اور پولیس اسٹیشن ریکارڈ مینجمنٹ سسٹم سمیت کمیونٹی پولیسنگ پروگرام سے بھی آگاہ کیا۔ ملاقات کے اختتام پر آئی جی پنجاب اور انڈونیشیا کے سفیر کے درمیان یادگاری سووینئرز کا تبادلہ کیا گیا جبکہ وفد نے شہدا و غازی والز، پولیس میوزیم اور سی پی او کے مختلف شعبوں کا دورہ بھی کیا۔اس موقع پر ایڈیشنل آئی جی پنجاب سلطان احمد چوہدری اور اے آئی جی ڈسپلن عمارہ اطہر بھی موجود تھے۔