وزیراعلی سندھ مراد علی شاہ کا سکھر اور گدو بیراج کا دورہ ، ریلیف کیمپوں کا معائنہ

سکھر (اُردو پوائنٹ اخبارتازہ ترین - اے پی پی۔ 14 ستمبر2025ء) وزیراعلیٰ سندھ سید مراد علی شاہ نے اتوار کو سکھر ، کشمور اور سیلاب سے متاثرہ علاقوں، ریلیف کیمپوں اور بیراجوں کا تفصیلی دورہ کیا ،انہوں نے ریلیف کیمپوں کا معائنہ کیا۔وزیراعلی سیدمرادعلی شاہ نے عوام کو یقین دہانی کرائی کہ ان کا تحفظ صوبائی حکومت کی اولین ترجیح ہے۔ انہوں نے عوام کو سندھ کے آئندہ مجوزہ زرعی ایمرجنسی پلان سے بھی آگاہ کیا جس کا مقصد گندم کی پیداوار میں اضافہ اور غذائی تحفظ کو یقینی بنانا ہے۔

مراد علی شاہ نے کہا کہ سندھ کی گندم کی پیداوار گزشتہ سال 42 لاکھ ٹن سے کم ہو کر رواں سال 31 لاکھ ٹن رہ گئی ہے تاہم مارچ 2026 تک کے لیے ذخائر موجود ہیں۔ انہوں نے بتایا کہ گندم کے کاشتکاروں کیلئے منصوبہ آئندہ ہفتے جاری کیا جائے گا تاکہ کاشتکاری کو بہتر بنایا جا سکے۔

(جاری ہے)

سکھر بیراج کے دورے کے موقع پر وزیراعلیٰ نے میڈیا کو سیلابی صورت حال اور حکومتی اقدامات پر بریفنگ دی۔

انہوں نے بتایا کہ سکھر بیراج پر پانی کی آمد 6 لاکھ 50 ہزار سے 7 لاکھ کیوسک کے درمیان ہے جو نیشنل ڈیزاسٹر مینجمنٹ اتھارٹی کی جانب سے دی گئی ابتدائی پیش گوئی 11 سے 12 لاکھ کیوسک سے کم ہے تاہم حکومت نے زیادہ مقدار کے پیش نظر ہی تیاریاں کی تھیں۔ حفاظتی پشتے آٹھ فٹ تک بلند کر دیے گئے ہیں اور حساس مقامات پر عملہ تعینات ہے۔ وزیراعلیٰ نے انسانی جانوں کو بچانے، اہم ڈھانچے کا تحفظ اور بندوں کو مضبوط بنانے سمیت حکومت کی تین ترجیحات بیان کیں۔

انہوں نے کہا کہ جانی نقصان کم سے کم ہے اور براہ راست سیلاب سے منسلک نہیں، مزید اموات سے بچنے کے لیے اقدامات کیے گئے ہیں ۔ انہوں نے وفاقی حکومت پر زور دیا کہ سیلاب متاثرین کے لیے امداد براہ راست بینظیر انکم سپورٹ پروگرام کے ذریعے فراہم کی جائے۔ انہوں نے کہا کہ پاکستان کو اقوام متحدہ اور عالمی برادری سے بھی مدد حاصل کرنی چاہیے کیونکہ اس تباہی کی اصل وجہ موسمیاتی تبدیلی ہے۔

صوبائی حکومت کے مطابق سندھ میں ریلیف سامان، میڈیکل کیمپ اور مویشیوں کی ویکسینیشن کی مہم پہلے ہی جاری ہے۔ جولائی سے اب تک ایک لاکھ سات ہزار سے زائد جانوروں کو حفاظتی ٹیکے لگائے جا چکے ہیں ۔سکھر بیراج پر چینی انجینئروں نے وزیراعلیٰ کو 16 نئے گیٹس کی تنصیب پر بریفنگ دی جو سندھ بیراجز امپروومنٹ پروجیکٹ کے تحت لگائے جا رہے ہیں۔