سائیکل ریس کے دوران فلسطین کے حق میں ہونے والے مظاہروں پر فخرہے،ہسپانوی وزیراعظم

پیر 15 ستمبر 2025 10:00

میڈرڈ (اُردو پوائنٹ اخبارتازہ ترین - اے پی پی۔ 15 ستمبر2025ء) سپین کے وزیراعظم پیڈرو سانچیز نےکہا ہے کہ انہیں وولٹا آ سپانہ سائیکل ریس کے دوران فلسطین کے حق میں ہونے والے مظاہروں پر فخرہے۔ اردو نیوز کےمطابق یہ مظاہرے غزہ میں تباہ کن جنگ کے باعث اسرائیلی ٹیم کے خلاف ہو رہے ہیں۔ ان مظاہروں نے سائیکلنگ کی اس عالمی سطح کی تین بڑی ریسوں میں سے ایک کے کئی مراحل میں خلل ڈالا ہے، اور اس بات پر سوالات اٹھا دیے ہیں کہ آیا 21 دن کی یہ ریس مکمل بھی ہو سکے گی یا نہیں۔

احتجاجی سرگرمیوں کے باعث کئی مراحل کو مختصر کرنا پڑا اور بعض اوقات مظاہرین کے اچانک ٹریک پر آ جانے سے حادثات بھی پیش آئے، جس پر کھلاڑیوں کی حفاظت اور سپین کی بین الاقوامی ساکھ پر خدشات کا اظہار کیا گیا ہے۔

(جاری ہے)

اس معاملے پر وزیراعظم پیڈرو سانچیز نے کہا کہ ہم کھلاڑیوں کا احترام کرتے ہیں لیکن ساتھ ہی ہمیں ایسے عوام پر فخر ہے جو فلسطین جیسے انصاف پسند مقصد کے لیے سڑکوں پر نکلتے ہیں۔

انہوں نے اپنی جماعت سوشلسٹ پارٹی کے ایک اجتماع میں کہا کہ آج کا سپین انسانی حقوق کے دفاع میں دنیا کے لیے ایک روشن مثال بن کر ابھرا ہے، ایک ایسا ملک جس پر ہمیں فخر ہونا چاہیے۔سپین میں فلسطینی کاز کے لیے حمایت طویل عرصے سے موجود ہے اور کئی حکومتی وزرا مظاہرین کی حمایت کر چکے ہیں۔میڈرڈ میں ا گزشتہ روز ریس کے فائنل مرحلے کے لیے سکیورٹی سخت کر دی گئی اور دارالحکومت میں 1100 پولیس اہلکار تعینات کیے گئے ۔